កំពត៖​៖​ ប្រធានមន្ទីរធម្មការ និងសាសនា​ ខេត្តកំពត លោក នាក់ យិតថូ បានឱ្យដឹងថា​ ការសាងសង់ប្រាសាទមាសលោកជំទាវ ម៉ៅ លើភ្នំទ្វា ទល់មុខអាស្រមចាស់ ជាទីតាំងសាក់សមបំផុតសម្រាប់ប្រជាពុទ្ធបរិស័ទគោរពប្រណិបត្តិតាមជំនឿលើលោកយាយម៉ៅ ហើយទីតាំងនេះក៏នឹងក្លាយទៅជាតំបន់ទេសចរណ៍សាសនាដ៏ទាក់ទាញថ្មីមួយបន្ថែមទៀតសម្រាប់ខេត្តកំពត ព្រោះលើកំពូលភ្នំនេះមានខ្យល់អាកាសបរិសុទ្ធ ថែមទាំងអាចមើលឃើញទេសភាពជួរភ្នំ និងខេត្តកំពតបានយ៉ាងស្រស់ស្អាត។

នៅព្រឹកថ្ងៃទី១៣ ខែមករា ឆ្នាំ២០២៥ លោក ម៉ៅ ធនិន អភិបាលខេត្ត និងលោកស្រី លោក តាក ហាប់ ប្រធានក្រុមប្រឹក្សាខេត្ត ព្រមទាំងថ្នាក់ដឹកនាំខេត្តគ្រប់លំដាប់ថ្នាក់ ប្រជាពុទ្ធបិរស័ទ បានជួបជុំគ្នាប្រារព្ធពិធីរំកិលរូបសំណាកលោកយាយ ម៉ៅ ចូលកាន់អាសនៈក្នុងប្រសាទមាសលោកជំទាវ ម៉ៅ នៅលើកំពូលភ្នំទ្វា ស្ថិតក្នុងភូមិល្អាង ឃុំល្អាង ស្រុកដងទង់ ខេត្តកំពត (ទល់មុខអាស្រមចាស់) ដែលប្រាសាទនេះកសាងឡើងដោយ​ លោក ម៉ៅ ធនិន និងលោកស្រី ហ៊ុន ចាន់ធី។

លោក នាក់ យិតថូ បានឱ្យដឹងថា ការសាងសង់ប្រាសាទមាសលោកជំទាវ ម៉ៅ នៅលើកំពូលភ្នំទ្វានេះ ក្នុងទិសដៅដើម្បីអភិរក្សក៏ដូចជាការកសាងកន្លែងជំនឿ ហើយទីនេះមានទីធ្លាធំទូលាយសម្រាប់ប្រជាពុទ្ធបរិស័ទគោរពបូជា។ ដោយឡែកទីតាំងអាស្រមលោកយាយ ម៉ៅ ដែលមានពីមុនមក​ ត្រូវបានរក្សាទុកនៅដដែល ហើយការកសាងប្រាសាទមាសនៅលើភ្នំនេះជាការកសាងបន្ថែមដើម្បីឱ្យមានភាពទូលំទូលាយសម្រាប់ការគោរពប្រណិប័ត្ត។ ម្យ៉ាងទៀត ទីតាំងនេះក្រោយពីបញ្ចប់ការសាងសង់ក៏នឹងអាចក្លាយទៅជាកន្លែងជំនឿ និងជាតំបន់ទេសចរណ៍សាសនាផងដែរ។

ជាមួយគ្នានេះ​ លោក សយ ស៊ីណុល ប្រធានមន្ទីរទេសចរណ៍ខេត្តកំពត ក៏បានឱ្យដឹងដែរថា ជារឿងមួយដែលល្អសម្រាប់ខេត្តកំពត ដែលប្រាសាទមាស​ លោកជំទាវ ម៉ៅ ត្រូវបានសាងសង់នៅលើកំពូលភ្នំទ្វានេះ ព្រោះប្រាសាទមាសនេះនឹងបានរួមចំណែកយ៉ាងសំខាន់ដល់វិស័យទេសចរណ៍តាមបែបជំនឿសាសនា ព្រោះទីតាំងនេះមានសក្តានុពលធម្មជាតិស្រាប់ដែលអំណោយផលដល់ការទាក់ទាញភ្ញៀវទេសចរ។ ក្រោយសាងសង់ប្រាសាទនេះរួច តំបន់នេះនឹងក្លាយទៅជាគោលដៅទេសចរណ៍សំខាន់ថ្មីមួយទៀតរបស់ខេត្តកំពត ហើយនឹងធ្វើឱ្យប្រជាពលរដ្ឋនៅតំបន់នោះមានជីវភាពកាន់តែប្រសើរឡើងបន្ថែមទៀត ដោយទាញយកផលប្រយោជន៍ពីវិស័យទេសចរណ៍។

សូមបញ្ជាក់ថា ប្រាសាទមាស​ លោកជំទាវ ម៉ៅ ត្រូវបានចាប់ផ្តើមកសាងឡើងនៅថ្ងៃទី១៨ ខែមេសា ឆ្នាំ២០២៤ ក្រោមគំនិតផ្តួចផ្តើមរបស់​ លោក ម៉ៅ ធនិន អភិបាលខេត្តកំពត និងលោកស្រី ហ៊ុន ចាន់ធី ម៉ៅធនិន ដើម្បីផ្តល់ភាពងាយស្រួលសម្រាប់ប្រជាពុទ្ធបរិស័ទគោរពប្រណិបត្តិលោកយាយ ម៉ៅ ផង និងជាកន្លែងសម្រាប់ភ្ញៀវទេសចរទៅលេងកម្សាន្តផង ព្រោះទីតាំងនេះមានខ្យល់អាកាសបរិសុទ្ធ អាចទស្សនាថ្ងៃរះ ថ្ងៃលិច ពិសេសមើលឃើញផ្ទៃសមុទ្រ ជួរភ្នំ និងខេត្តកំពតផងដែរ៕

អត្ថបទ៖ វង្ស សុធារម្យ