ទេសរដ្ឋមន្ត្រី លី ធុជ ស្នើដល់ថ្នាក់ដឹកនាំខេត្តជាប់ព្រំដែនកម្ពុជា-វៀតណាម បន្តកិច្ចសហប្រតិបត្តិការរក្សាសុខសន្តិភាពសណ្ដាប់ធ្នាប់និងការអភិវឌ្ឍន៍
រតនគិរី៖ ការស្នើសុំបែបនេះគឺបានធ្វើឡើងនៅ ព្រឹកថ្ងៃទី៦ ខែមករា ឆ្នាំ២០២០ ខណៈដែលឯកឧត្តទេសរដ្ឋមន្ត្រី លី ធុជ ក្នុងនាមសម្តេចតេជោនាយករដ្ឋមន្ត្រី បានអញ្ជើញចូលរួមជាគណ:អធិបតី និងបំពាក់មេដៃជូនថ្នាក់ដឹកនាំខេត្តយ៉ាឡាយ និងកន្ទូម នៃសាធារណ:រដ្ឋសង្គមនិយមវៀតណាម។
ឯកឧត្តម ទេសរដ្ឋមន្ត្រី លី ធុជ បានកោតសរសើរនិងវាយតម្លៃខ្ពស់ចំពោះការយកចិត្តទុកដាក់ និងខិតខំប្រឹងប្រែងដឹកនាំនិងអភិវឌ្ឍ ខេត្តរតនគិរី តាមយុទ្ធសាស្ត្រនិងគោលនយោបាយរបស់រាជរដ្ឋាភិបាលកម្ពុជា ក្រោមការដឹកនាំរបស់សម្តេចតេជោនាយករដ្ឋមន្ត្រី។ ជាមួយគ្នានោះ ឯកឧត្តមទេសរដ្ឋមន្ត្រី បានស្នើសុំថ្នាក់ដឹកនាំខេត្តរតនគិរីបន្តទំនាក់ទំនងនិងសហប្រតិបត្តការល្អជាមួយថ្នាក់ដឹកនាំខេត្តយ៉ាឡាយ និងខេត្តកន្ទូម ដើម្បីរក្សាការពារ សន្តិសុខ សណ្តាប់ធ្នប់ សុវត្ថិភាពសង្គម និងការអភិវឌ្ឍ ដើម្បីជាប្រយោជន៍សម្រាប់ប្រទេសនិងប្រជាជនទាំងពីរ។
ជាងនោះទៅទៀត ឯកឧត្តមទេសរដ្ឋមន្ត្រី ក៏បានរំលឹកនូវទំនាក់ទំនងល្អជាប្រពៃណីយ៍រវាងកម្ពុជាវៀតណាមតាំងពីថ្ងៃ៧ ខែមករា ឆ្នាំ១៩៧៩ ដល់សព្វថ្ងៃ ជាពិសេស ឯកឧត្តមទេសរដ្ឋមន្ត្រី សូមថ្លែងអំណរគុណដល់ថ្នាក់ដឹកនាំ បងប្អូនកងទ័ពវៀតណាម បានចូលរួមរំដោះប្រជាជនកម្ពុជាចេញពីរបបប្រល័យពូជសាសន៍ប៉ុល ពត តាមការស្នើសុំរបស់សម្តេចតេជោនាយករដ្ឋមន្ត្រី នាពេលកន្លងមក៕ដោយ៖ប៉េស សារី