សហរដ្ឋអាម៉េរិក៖ អំឡុងជំនួបនៅឯសេតវិមាន លើការពិភាក្សាអំពីកិច្ចព្រមព្រៀងធនធានរ៉ែ ប្រធានាធិបតីអ៊ុយក្រែន លោក វ្លូឌីមៀរ ហ្សេលែនស្គី (Volodymyr Zelenskiy) និងសមភាគីអាម៉េរិក លោក ដូណាល់ ត្រាំ (Donald Trump) បានផ្លាស់ប្ដូរពាក្យសម្ដីដ៏តានតឹង កាលពីថ្ងៃសុក្រ (ទី២៨ ខែកុម្ភៈ) ដោយលោក ហ្សេលែនស្គី (Zelenskiy) បានក្រើនរម្លឹកលោកត្រាំ (Trump) ឱ្យមានការប្រុងប្រយ័ត្ននៅក្នុងទំនាក់ទំនងជាមួយរុស្ស៊ី ខណៈលោកត្រាំ (Trump) បានចោទប្រកាន់លោកហ្សេលែនស្គី (Zelenskiy) ថាមានអាកប្បកិរិយាមិនសមរម្យ ។

មេដឹកនាំទាំងពីរ បានជួបគ្នានៅឯការិយាល័យអូវ៉ល (Oval) ដើម្បីពិភាក្សាចុះហត្ថលេខាលើកិច្ចព្រមព្រៀងសម្រាប់ការចូលរួមរបស់សហរដ្ឋអាម៉េរិក នៅក្នុងឧស្សាហកម្មរ៉ែក្នុងប្រទេសអ៊ុយក្រែន ។

ក្នុងនោះ លោក ហ្សេលែនស្គី (Zelenskiy) បានធ្វើការជំទាស់ដោយបើកចំហរចំពោះ គោលជំហររបស់លោកត្រាំ (Trump) ជាមួយលោកពុទីន (Putin) ថាជាជំហរដែលទន់ខ្សោយ ហើយលោកត្រាំ (Trump) បានឆ្លើយតបទៅកាន់មេដឹកនាំអ៊ុយក្រែន ដោយព្រមានថា «លោកហ្សេលែនស្គី កំពុងលេងល្បែងជាមួយនឹងសង្គ្រាមលោកលើកទី៣» ។

លោកត្រាំ ក៏បានលើកឡើងបន្ថែមទៀតថា «លោកហ្សេលែនស្គី គួរតែគិតទៅថា គួរតែធ្វើកិច្ចព្រមព្រៀងមួយ ឬក៏ដកការគាំទ្ររបស់សហរដ្ឋអាម៉េរិកចេញវិញ»?

ទន្ទឹមនឹងនោះ លោកហ្សេលែនស្គី (Zelenskiy) បានជំរុញឱ្យលោកត្រាំ (Trump) គួរកុំធ្វើការសម្របសម្រួលជាមួយរុស្ស៊ី ដោយបានហៅលោកពុទីន ថាជា ”ឃាតករ”។ ជាចម្លើយ លោកត្រាំ ដែលមានបំណងបញ្ចប់សង្គ្រាមឱ្យបានឆាប់រហ័ស ព្រមទាំងពង្រឹងទំនាក់ទំនងអាម៉េរិក-រុស្ស៊ី បានបង្ហាញនូវការមិនយល់ស្របចំពោះពាក្យសម្ដីរបស់លោកហ្សេលែនស្គី ហើយបានសង្កត់ធ្ងន់ថា អ៊ុយក្រែន គួរតែបង្ហាញនូវការដឹងគុណឱ្យបានច្រើនបន្ថែមទៀត ។

ក្រោយពីមានជម្លោះពាក្យសម្ដីរវាងមេដឹកនាំកំពូលទាំងពីររួចមក លោកហ្សេលែនស្គី និយាយថា លោកនៅតែផ្ដល់ការគោរពជានិច្ចចំពោះលោកត្រាំ ព្រមទាំងប្រជាជនអាម៉េរិកទាំងអស់គ្នា នេះបើយោងតាមអ្វីដែលប្រធានាធិបតីអ៊ុយក្រែន បានរៀបរាប់ទៅកាន់ទីភ្នាក់ងារសារព័ត៌មាន ហ្វុកញូវ (Fox News) នាថ្ងៃតែមួយនោះ ។

គួររម្លឹកថា លោកហ្សេលែនស្គី ទំនងជាយល់ឃើញថា ជំនួបនោះ ជាឱកាសសម្រាប់លោក ក្នុងការបញ្ចុះបញ្ចូលឱ្យសហរដ្ឋអាម៉េរិក គួរកុំមានគោលជំហរខ្លាំងពេកលើលោកពុទីន ប៉ុន្តែជាចុងក្រោយ ការប៉ះទង្គិចពាក្យសម្ដីគ្នា ក៏បានធ្វើឱ្យជំនួបបញ្ចប់ទៅដោយមិនទទួលបានលទ្ធផលជាផ្លែផ្កា ស្របពេលមន្ត្រីអាម៉េរិកម្នាក់ លួចបង្ហើបថា មេដឹកនាំអ៊ុយក្រែន ត្រូវគេប្រាប់ឱ្យចាកចេញពីជំនួបថែមទៀតផង ៕

ប្រែសម្រួល៖ ឡេង លាងហេង
ប្រភព៖ Reuters Connect
រូបភាព៖ inquisitr/ Others