ហ្រ្គីនឡែន៖ នៅថ្ងៃអង្គារខាងមុខនេះ ពលរដ្ឋនៅតំបន់ Greenland នឹងនាំគ្នាទៅបោះឆ្នោតដើម្បីជ្រើសរើសមេដឹកនាំថ្មី បន្ទាប់ពីបានបញ្ចប់រដូវកាលឃោសនារយៈពេលជាច្រើនថ្ងៃ ដែលបានផ្តោតសំខាន់លើបញ្ហាឯករាជ្យភាពរបស់កោះ Greenland ចេញពីប្រទេសដាណឺម៉ាក ដើម្បីកុំឱ្យប្រធានាធិបតីអាម៉េរិក លោកដូណាល់ត្រាំអាចមានលេសប្រើប្រាស់អំណាចទឹកប្រាក់ ដើម្បីចរចាទិញយកតំបន់ស្វយ័តមួយនេះ ពីរដ្ឋាភិបាលដាណឺម៉ាក។

គួរជម្រាបថា សារនយោបាយដដែលៗរបស់លោកដូណាល់ត្រាំ ដែលបង្ហាញពីបំណងចង់គ្រប់គ្រងតំបន់ Greenland ឱ្យខានតែបាន បើទោះបីជាត្រូវប្រើប្រាស់មធ្យោបាយយោធាក៏ដោយនោះ បានជំរុញឱ្យចលនាប្រកាសឯករាជ្យរបស់កោះ Greenland កាន់តែមានសន្ទុះខ្លាំងមិនធ្លាប់មាន ខណៈគិតជាសរុបគឺមានពលរដ្ឋ Greenland ប្រមាណជិត ៦ម៉ឺននាក់ បានទទូចចង់រក្សាអត្តសញ្ញាណដើមរបស់ខ្លួន ដោយមិនចង់ក្លាយជាពលរដ្ឋរបស់សហរដ្ឋងាម៉េរិក ឫក៏ជាពលរដ្ឋរបស់ប្រទេសដាណឺម៉ាកនោះឡើយ។

ជុំវិញរឿងនេះ អ្នកជំនាញផ្នែកវិទ្យាសាស្ត្រនយោបាយមួយរូបរបស់សាកលវិទ្យាល័យ Greenland អ្នកនាង Maria បានប្រាប់សារព័ត៌មាន AFP ថា៖ “នយោបាយចង់ដណ្តើមគ្រប់គ្រងតំបន់ Greenland របស់លោកដូណាល់ត្រាំ បានដុតបញ្ឆេះឱ្យមានចលនាឯករាជ្យឡើងវិញនៅក្នុងស្មារតីរបស់ពលរដ្ឋ Greenland ”។

អ្នកជំនាញរូបនេះបានបន្តថា ការចង់បានឯករាជ្យភាពនេះគឺមិនមែនរឿងថ្មីថ្មោងសម្រាប់ពលរដ្ឋ Greenland ព្រោះកាលពីឆ្នាំ ២០០៨កន្លងទៅ មានពលរដ្ឋ Greenland សរុបជាង ៧៥% ធ្លាប់បានបោះឆ្នោតប្រជាមតិគាំទ្រប្រព័ន្ធអំណាចរដ្ឋបាលស្វយ័តចេញពីការគ្រប់គ្រងរបស់ប្រទេសដាណឺម៉ាក។

ហេតុដូចនេះ ការដែលលោកដូណាល់ត្រាំបន្តបង្ហាញមហិច្ឆតាចង់ធើ្វការគ្រប់គ្រងតំបន់ Greenland នេះ បានធើ្វឱ្យក្រុមអ្នកនយោបាយនៅតំបន់ Greenland កាន់តែមានឱកាសខ្លាំងក្នុងការសម្រេចគោលដៅឯករាជ្យភាពរបស់ខ្លួន ចេញពីប្រទេសដាណឺម៉ាក ស្របពេលក្រុមតំណាងរាស្រ្តស្ទើតែទាំងអស់នៅក្នុងសភារបស់ Greenland សុទ្ធតែបានបង្ហាញការគាំទ្រចំពោះគំនិតឯករាជ្យភាពរបស់ Greenland ដើម្បីឈានទៅបង្កើតរដ្ឋអធិបតេយ្យភាពថ្មីមួយ ដែលមានទំហំធំជាងប្រទេសដាណឺម៉ាករហូតដល់ ៥០ដង ប៉ុន្តែមានចំនួនពលរដ្ឋរស់នៅតិចជាងរហូតដល់ជិត ១០០ដង៕

ប្រែសម្រួល៖ វ័រ តុលា
ប្រភព៖ Reuters Connect