ព្រះវិហារ៖ សម្តេចអគ្គមហាសេនាបតីតេជោ ហ៊ុន សែន នាយឧត្តមសេនីយ៍ផុតលេខ ផ្កាយមាស៥ ប្រធានព្រឹទ្ធសភានៃកម្ពុជា នៅរសៀលថ្ងៃទី២៦ ខែមិថុនា ឆ្នាំ២០២៥នេះ មានប្រសាសន៍ថា ការជម្លៀសប្រជាពលរដ្ឋកម្ពុជានេះហើយ ជាទង្វើរដែលសុំឱ្យអន្តរជាតិមើលឃើញថា តើកម្ពុជា និងថៃ អ្នកណាជាអ្នកឈ្លានពានអ្នកណា, តើថៃបានជម្លៀសប្រជាជន ដោយសារកម្ពុជា ឈ្លានពានដែរទេ?
នេះបានបង្ហាញថា កម្ពុជា ជាជនរងគ្រោះ ដោយសារការឈ្លានពានរបស់ថៃ។ សុំឱ្យបរទេសទាំងឡាយ ប្រកាន់សច្ចៈធម៌ មើលឃើញឱ្យច្បាស់ នូវការឈ្លានពានរបស់កងទ័ពថៃ មកលើកម្ពុជា។
សម្ដេចលើកឡើងបែបនេះក្នុងឱកាស អញ្ជើញសំណេះសំណាលសួរសុខទុក្ខប្រជាជនដែលត្រូវបានជម្លៀសមកមណ្ឌលសុវត្ថិភាព វត្តពោធិ៍៥០០០ដើម នារសៀលថ្ងៃទី២៦ មិថុនា ២០២៥ នេះ នៅខេត្ដព្រះវិហារ ។
សម្ដេចតេជោបានបន្ដថា “យើងប្រាថ្នាធ្វើជាមិត្ដតែគេវិញចិញ្ចឹម​ចិត្ដម្ដងហើយម្ដងទៀតឈ្លានពានដណ្ដើមទឹកដីរបស់យើង ។ជិត១០ឆ្នាំហើយកម្ពុជា-ថៃ មិនមានរឿងអ្វីកើតឡើងទេ តាំងតែពីខ្ញុំនៅជានាយករដ្ឋមន្ដ្រី ហើយយើងក៏បានបន្ដការងារយ៉ាងល្អជាមួយនាយករដ្ឋមន្ដ្រីច្រើនមកហើយនាពេលកន្លងមក តែជាអកុសលនាយករដ្ឋមន្ដ្រីថ្មីដែលទើបឡើងកាន់តំណែងប៉ុន្មានខែកន្លងមកនេះបែរជាមានរឿងបែបនេះទៅវិញ”៕
អត្ថបទ៖ ឈឹម ធីតា រូបភាព៖ ប៉ក់ សុឃីម