ថៃឡង់ដ៍៖ នាយកដ្ឋានបង្ការ និងកាត់បន្ថយគ្រោះមហន្តរាយរបស់ថៃ ហៅកាត់ថា DDPM បានរាយការណ៍កាលពីថ្ងៃទី២៣ ខែកញ្ញាថា ទឹកជំនន់នៅតែបន្តប៉ះពាល់ដល់ខេត្តចំនួន ១៦ ដែលមានមនុស្សជាង ២៥ម៉ឺននាក់រងផលប៉ះពាល់ និង ៤នាក់ស្លាប់នៅក្នុងខេត្ត ភេតឆាប៊ុន (Phetchabun), ភីឈីត (Phichit) និងអាយុធ្យា (Ayutthaya)។ ក្នុងនោះស្រុកចំនួន ៦៣ ឃុំចំនួន ៣៧២ និងភូមិជាង ២០០០ ភូមិត្រូវទឹកជំនន់ជនលិចធ្ងន់ធ្ងរ ។
ទឹកដែលហូរហៀរចេញពីទំនប់ទឹកចៅប្រាយ៉ា (Chao Phraya) បានបណ្តាលឱ្យមានទឹកជំនន់នៅក្នុងខេត្តភាគកណ្តាលចំនួន ៨ រួមមាន ឧទ័យធានី (Uthai Thani), សិងបុរី (Sing Buri), អាងថុង (Ang Thong), ស៊ុផានបុរី (Suphan Buri), អាយុធ្យា (Ayutthaya), បទុមធានី (Pathum Thani) និងនគរបទុម (Nakhon Pathom)។ ដោយស្ថានភាពនេះ បានប៉ះពាល់ដល់មនុស្សជាង ១៨ម៉ឺននាក់ក្នុងចំណោមជាង ៥៦,០០០ គ្រួសារ ដោយមានអ្នកស្លាប់ចំនួន ២នាក់នៅក្នុងខេត្តអាយុធ្យា ៕
ប្រែសម្រួល៖ ឡេង លាងហេង
ប្រភព៖ The Nation Thailand | រូបភាព-Photo៖ Khaosod English