សិស្សនិទ្ទេសAចំនួន ៧៩នាក់ នៅខេត្តកំពង់ស្ពឺ ទទួលបានរង្វាន់កុំព្យូទ័រ
កំពង់ស្ពឺ៖ ដូចដែលបានសន្យា លោកឧបនាយករដ្ឋមន្ត្រី ហ៊ុន ម៉ានី រដ្ឋមន្ត្រីក្រសួងមុខងារសាធារណៈ ប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ស្ពឺ បានប្រគល់រង្វាន់កុំព្យូទ័រចំនួន ៧៩គ្រឿង ដល់សិស្សនិទ្ទេសA ចំនួន៧៩នាក់នៅខេត្តកំពង់ស្ពឺ នៅថ្ងៃទី១ ខែតុលា ឆ្នាំ២០២៥។
លោកឧបនាយករដ្ឋមន្រ្តី ហ៊ុន ម៉ានី បានលើកឡើងថា លទ្ធផលនិទ្ទេសA ពិតជាបានលើកកម្ពស់មុខមាត់របស់ខេត្តកំពង់ស្ពឺ ពិសេស មុខមាត់សាលា លោកគ្រូអ្នកគ្រូ និងក្រុមគ្រួសារតែម្តង។
លោកបញ្ជាក់បន្ថែមថា ជាមួយនឹងភាពជោគជ័យដែលទទួលបាននាពេលនេះវាពិតណាស់ជាសមត្ថភាព ប៉ុន្តែត្រូវដឹង និងមិនអាចបំភ្លេចបាននោះគឺ ឪពុកម្តាយ អាណាព្យាបាល ដែលបានផ្តល់ឱកាស និងការទំនុកបម្រុងក្នុងការរៀនសូត្រ ជាពិសេសលោកគ្រូអ្នកគ្រូដែលបានណែនាំ បង្ហាត់បង្រៀនរហូតទទួលលទ្ធផលបែបនេះ។ ក្រោយបញ្ចប់ការសិក្សានៅថ្នាក់ឧត្តម និងក្រោយចេញបំពេញការងារសង្ឃឹមថា នឹងវិលត្រលប់មកចែករំលែកទៅកាន់អ្នកដទៃ និងអ្នកជំនាន់ក្រោយ ពិសេសមកជួយអភិវឌ្ឍន៍ខេត្តកំពង់ស្ពឺឱ្យមានការរីកចម្រើនកាន់តែខ្លាំងបន្ថែមទៀត ចៀសផុតពីការមាក់ងាយថាជាខេត្តប៊ុមប៊ឺរលាក់កងជើង។
សូមបញ្ជាក់ថា ក្រៅពីផ្ដល់រង្វាន់ដល់សិស្សនិទ្ទេសA លោកឧបនាយករដ្ឋមន្ត្រី ហ៊ុន ម៉ានី ក៏បានផ្ដល់លិខិតថ្លែងអំណរគុណ និងថវិកាមួយចំនួនដល់លោកគ្រូ អ្នកគ្រូ ផងដែរ៕
អត្ថបទ៖ ប៊ុត សារុន
