ភ្នំពេញ៖​ អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានគណៈកម្មការសម្របសម្រួលក្រុមការងារផ្នែកឯកជន សម្រាប់យន្តការវេទិការាជរដ្ឋាភិបាល-ផ្នែកឯកជន (គ.ស.ឯ.រ.ជ) បានដឹកនាំសមាជិកសមាជិកា នៃសភាពាណិជ្ជកម្មកម្ពុជា, សហប្រធានក្រុមការងារផ្នែកឯកជនទាំង១៦ និងក្រុមហ៊ុន-សមាគម ជាតិ-អន្តរជាតិ ចូលរួមវេទិកា ស្តីពី “វិនិយោគ និងការធ្វើពាណិជ្ជកម្មជាមួយសហរដ្ឋអាម៉េរិក”។

វេទិកានេះ ប្រព្រឹត្តទៅនាព្រឹកថ្ងៃទី​ ២ខែតុលា​ឆ្នាំ២០២៥​ ក្រោមអធិបតីភាពដ៏ខ្ពង់ខ្ពស់ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា ព្រមទាំងវត្តមាន ឯកឧត្តមបណ្ឌិត គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី អគ្គនាយកនៃអគ្គនាយកដ្ឋានគយ​ និងរដ្ឋាករកម្ពុជា។

វេទិកានេះ ក៏មានការអញ្ជេីញចូលពីវាគ្មិនកិត្តិយស​ ក្នុងកិច្ចពិភ្សារួមមាន​ ឯកឧត្តម ជា វុទ្ធី អគ្គលេខាធិការ គណៈកម្មាធិការវិនិយោគកម្ពុជា, ឯកឧត្តម ហូ ស៊ីវយ៉ុង ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយកនៃអគ្គនាយកដ្ឋានសេវាពាណិជ្ជកម្ម នៃក្រសួងពាណិជ្ជកម្ម​ និងឯកឧត្តម សុខ ពិសិដ្ឋ ទីប្រឹក្សាផ្ទាល់សម្តេចមហាបវរធិបតីនាយករដ្ឋមន្ត្រី​ ព្រមទាំងមានការចូលរួមពីសភាពាណិជ្ជកម្មអាម៉េរិក (AmCham), សមាគមភស្តុភារកម្មកម្ពុជា (CLA), សមាគមសភាពាណិជ្ជកម្មម៉ាឡេស៊ីនៅកម្ពុជា (MBCC), សមាគមផលិតគ្រឿងអេឡិចត្រូនិក និងបច្ចេកវិទ្យាកម្ពុជា ជើងសាគយ រួមជាមួយថ្នាក់ដឹកនាំ និងមន្ដ្រីពីក្រសួង-ស្ថាប័ន និងវិស័យឯកជនពាក់ព័ន្ធ ដែលមានសមាសភាពប្រមាណ ៣៤០រូប។

វេទិកានេះមានគោលបំណង ផ្សព្វផ្សាយអំពីច្បាប់និងបទប្បញ្ញត្ដិជាធរមាន ដល់វិនិយោគិនក្នុងវិស័យឧស្សាហកម្មកែច្នៃនាំចេញទៅសហរដ្ឋអាម៉េរិក ដើម្បី ចូលរួមចំណែកបង្ការនិងទប់ស្កាត់បទល្មើស បន្លំដើមកំណើតទំនិញទៅកាន់ទីផ្សារសហរដ្ឋអាម៉េរិក។

នៅក្នុងវេទិកានេះ មានការចូលរួមធ្វើបទបង្ហាញដោយតំណាងក្រុមប្រឹក្សាអភិវឌ្ឍន៍កម្ពុជា​លើប្រធានបទ “កាលានុវត្តភាពនិងនិន្នាការវិនិយោគនៅកម្ពុជា” តំណាង​អគ្គនាយកដ្ឋានគយ​ និងរដ្ឋាករកម្ពុជា​ លើប្រធានបទ “ការធ្វើធុរកិច្ច ជាមួយសហរដ្ឋអាម៉េរិកក្នុងបរិបទ ពន្ធគយបដិការ-ពន្ធគយ​ និងរបាំងមិនមែនពន្ធគយ ” តំណាងក្រសួងពាណិជ្ជកម្ម លើប្រធានបទ “វិធានការដើមកំណើតនិងវិធានការបង្ការ ការបន្លំដើមកំណើតទំនិញ” និងទីប្រឹក្សាផ្ទាល់សម្តេចមហាបវរធិបតីនាយករដ្ឋមន្ត្រី លើប្រធានបទ “ការវិនិយោគនិងការធ្វើពាណិជ្ជកម្ម តុល្យភាពរវាងការថែរក្សាទីផ្សារសហរដ្ឋអាម៉េរិកនិងការទាក់ទាញវិនិយោគ”។

បន្ទាប់មក មានរៀបចំកិច្ចពិភាក្សា ឆ្លើយតបនឹងបញ្ហាប្រឈម​ និងសំណូមពរដែលជាកង្វល់របស់វិស័យឯកជន ដោយវាគ្មិនមកពី អគរ កអក កពណ និងទីប្រឹក្សាផ្ទាល់សម្តេចមហាបវរធិបតីនាយករដ្ឋមន្ត្រី។

តាមរយៈវេទិកានេះ​ ក្រុមប្រឹក្សាអភិវឌ្ឍន៍កម្ពុជា, អគ្គនាយកដ្ឋានគយ​ និងរដ្ឋាករកម្ពុជា និងក្រសួងពាណិជ្ជកម្ម​ បានប្ដេជ្ញារួមគ្នាដោះស្រាយបញ្ហានិងសំណូមពររបស់វិនិយោគិន ដើម្បីបង្ការនិងទប់ស្កាត់បទល្មើស បន្លំដើមកំណើតទំនិញរក្សាទីផ្សារសហរដ្ឋអាម៉េរិក និងទាក់ទាញការវិនិយោគ ប្រកបដោយការទទួលខុសត្រូវ តម្លាភាព និងអនុលោមភាព៕

អត្ថបទ៖​ សៀម​ ប៊ុនធី​ រូបភាព៖​ លឹម​ មុនី​ និង​អ៊ុន​ ផាន់ណាត