ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទីនៃព្រះរាជាណាចក្រកម្ពុជា នៅវិមានព្រឹទ្ធសភា នារសៀលថ្ងៃទី២ ខែតុលា ឆ្នាំ២០២៥ អនុញ្ញាតឱ្យ ប្រតិភូសមាជិកព្រឹទ្ធសភាសហព័ន្ធម៉ាឡេស៊ីដឹកនាំដោយ លោក Datuk Wira Dr. Mohd Hatta bin Md Ramli ចូលជួបសម្តែងការគួរសមនៅវិមានព្រឹទ្ធសភា។
យោងតាមលោក ជា ធីរិទ្ធ អ្នកនាំពាក្យព្រឹទ្ធសភា នៅក្នុងជំនួបនេះ សម្ដេចតេជោ ហ៊ុន សែន បានសម្ដែងនូវការស្វាគមន៍ចំពោះប្រតិភូរបស់សហព័ន្ធសភាសន្តិភាពពិភពលោកដែលអញ្ជើញមកបំពេញបេសកកម្មនៅក្នុងព្រះរាជាណាចក្រកម្ពុជា និងបានចាត់ទុកវត្តមានរបស់ប្រតិភូសហព័ន្ធសភាសន្តិភាពពិភពលោកមកកាន់កម្ពុជានៅពេលនេះ នឹងធ្វើឱ្យទំនាក់ទំនងរវាងសហព័ន្ធសភាសន្តិភាពពិភពលោក
ជាមួយនឹងស្ថាប័ននីតិប្បញ្ញត្តិ នៅក្នុងព្រះរាជាណាចក្រកម្ពុជា និយាយជារួមការពង្រឹងទំនាក់ទំនងបន្ថែមទៀត រវាងកម្ពុជាជាមួយនឹងម៉ាឡេស៊ី ឱ្យកាន់តែមានភាពល្អប្រសើរ។
នៅក្នុងឱកាសនោះ លោក Mohd Hatta បានសម្ដែងការអរគុណចំពោះសម្ដេចតេជោដែលបានអនុញ្ញាតឱ្យលោក និងប្រតិភូបានជួបសម្ដែងការគួរសមនៅថ្ងៃនេះហើយឯកឧត្តមក៏បានលើកឡើងនូវក្តីរីករាយដែលបានជួបសម្ដេចតេជោសារជាថ្មី ហើយបានសរសើរអំពីភាពជាអ្នកដឹកនាំរបស់សម្ដេចតេជោ ដែលកន្លងទៅបានដឹកនាំប្រទេសកម្ពុជាឱ្យមានការរីកចម្រើនជាបន្តបន្ទាប់។ លោកនិងប្រតិភូគឺរីករាយ និងរង់ចាំស្ដាប់នូវការចែករំលែកបទពិសោធប្រកបដោយគតិបណ្ឌិតពីសម្ដេចតេជោដែលមានបទពិសោធដ៏ច្រើននៅក្នុងអាជីពជាអ្នកនយោបាយ ជាអ្នកដឹកនាំ នាពេលកន្លងមក។
សម្ដេចតេជោក៏បានលើកឡើងដោយបានចែករំលែកអំពីស្ថានភាពរបស់ប្រទេសកម្ពុជាការពីអតីតកាល ជាពិសេសការដឹកនាំរបស់សម្ដេចក្នុងការនាំកម្ពុជាចេញពីរបបប្រល័យពូជសាសន៍ និងការធ្វើឱ្យកម្ពុជាទទួលបាននូវសុខសន្តិភាពនៅឆ្នាំ១៩៩៨ ដែលបញ្ចប់ទាំងស្រុងនូវសង្គ្រាមស៊ីវិល រហូតដល់ប្រទេសមានការអភិវឌ្ឍរីកចម្រើនជាបន្តបន្ទាប់ដល់សព្វថ្ងៃនេះ។ បច្ចុប្បន្នកម្ពុជាមានមេដឹកនាំថ្មីដែលជាអ្នកជំនាន់ក្រោយកំពុងតែដឹកនាំប្រទេសយ៉ាងស្វាហាប់ និងដើរយ៉ាងលឿនក្នុងការបំពេញនូវការដឹកនាំសម្រាប់ឱ្យប្រទេសកម្ពុជារីកចម្រើនទៅមុខទៀត។
នៅក្នុងឱកាសនោះ សម្ដេចតេជោក៏បានចែករំលែកពីបញ្ហាប្រឈមនាពេលបច្ចុប្បន្ន រវាងបញ្ហាព្រំដែនកម្ពុជា និងថៃ។សម្តេចតេជោបានពន្យល់អំពីរឿងរ៉ាវនៃការកើតឡើង និងបញ្ហាប្រឈមនាពេលបច្ចុប្បន្ន និងកំពុងតែឈានទៅរកការធ្វើយ៉ាងណាឱ្យមានដំណោះស្រាយវិលមករកប្រក្រតីភាពឡើងវិញ ដែលជាជំហររបស់កម្ពុជា។
អ្វីដែលកម្ពុជាចង់បាន គឺការរក្សានូវបទឈប់បាញ់ឱ្យបាន ហើយដោះស្រាយបញ្ហាឈានទៅរកដំណោះស្រាយមួយវិលមករកប្រក្រតីឡើងវិញ ដែលប្រទេសទាំងពីរធ្លាប់មានកន្លងមក។ ជាមួយគ្នានេះសម្ដេចតេជោក៏បានអរគុណចំពោះតួនាទីដ៏សកម្មរបស់ម៉ាឡេស៊ីនៅក្នុងការសម្របសម្រួលដោះស្រាយបញ្ហាព្រំដែនរវាងកម្ពុជា និងថៃ ជាពិសេសសម្ដេចតេជោក៏បានអរគុណចំពោះឯកឧត្តម អាន់វ៉ា អ៊ីប្រាហ៊ីម ដែលបានបំពេញតួនាទីយ៉ាងរហ័ស និងលឿនក្នុងការសម្របសម្រួលដោះស្រាយបញ្ហាព្រំដែនរវាងកម្ពុជា និងថៃ។
ឱកាសនោះ លោកសមាជិកព្រឹទ្ធសភារបស់ម៉ាឡេស៊ី ដែលជាប្រធានប្រតិភូបានសំដែងនូវការអរគុណចំពោះសម្តេចតេជោដែលបានចែករំលែក និងពន្យល់យ៉ាងក្បោះក្បាយ និងគ្រប់ជ្រុងជ្រោយពីទិដ្ឋភាពនៅក្នុងព្រះរាជាណាចក្រកម្ពុជាពីអតីតកាល និងទិដ្ឋភាពនៃបញ្ហាវិវាទ
ព្រំដែនរវាងកម្ពុជា និងថៃនាពេលបច្ចុប្បន្ន។ លោកសង្ឃឹមថា វិវាទព្រំដែនរវាងប្រទេសទាំងពីរ នឹងអាចដោះស្រាយបានដោយសន្តិវិធីខាងមុខ ហើយសង្ឃឹមថា សន្តិភាពនឹងកើតមានឡើងវិញសម្រាប់ប្រទេសទាំងពីរ។
ជាមួយគ្នានេះលោក ក៏បានរំលេចដោយសរសើរចំពោះភាពរីកចម្រើន និងការអភិវឌ្ឍនៅក្នុងប្រទេសកម្ពុជា ជាពិសេសឯកឧត្តមពិតជាមានសំណាងដែលបានធ្វើដំណើរចុះចតនៅអាកាសយានដ្ឋានអន្តរជាតិតេជោ ដែលជាអាកាសយានដ្ឋានថ្មីរបស់កម្ពុជា ដែលមានភាពធំទូលាយ ដែលបញ្ជាក់ពីភាពរីកចម្រើនរបស់កម្ពុជា។ លោកក៏បានសរសើរចំពោះការរីកចម្រើននៃទីក្រុងភ្នំពេញ ដែលមានការអភិវឌ្ឍរីកចម្រើនពីមួយឆ្នាំទៅមួយឆ្នាំ ជាពិសេសផ្នែកសេដ្ឋកិច្ច ពាណិជ្ជកម្មរបស់ប្រទេសកម្ពុជាតែម្ដង៕
អត្ថបទ៖ សន ពិសិដ្ឋ