ភ្នំពេញ៖ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភាកម្ពុជា បានទទួលជួបពិភាក្សាការងារជាមួយគណៈប្រតិភូសហព័ន្ធសភាសន្ដិភាពពិភពលោកនៃសភាម៉ាឡេស៊ី (PFWP) ដឹកនាំដោយលោកបណ្ឌិត ដាតុក វីរ៉ា ម៉ុដ ហាតា ប៊ីន អឹមឌី រ៉ាមលី (YB SENATOR DA TUK WIRA DR. MOHD HATTA BIN MD RAMLI) សមាជិកព្រឹទ្ធសភាម៉ាឡេស៊ី នៅព្រឹកថ្ងៃទី៣ ខែតុលា ឆ្នាំ ២០២៥ ក្នុងពេលដែលគណៈប្រតិភូបំពេញទស្សនកិច្ចនៅកម្ពុជា។

សម្តេចរដ្ឋសភាធិបតី បានស្វាគមន៍យ៉ាងកក់ក្តៅចំពោះលោកបណ្ឌិត និងគណៈប្រតិភូ ដែលបានមកបំពេញទស្សនកិច្ចនៅកម្ពុជា និងបានជួបពិភាក្សាការងារជាមួយថ្នាក់ដឹកនាំរបស់កំពូលៗរបស់កម្ពុជា មាន សម្តេចតេជោ ហ៊ុន សែន ប្រធានព្រឹទ្ធសភា និងជាប្រមុខរដ្ឋស្តីទីនៃព្រះរាជាណាចក្រកម្ពុជា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ប្រកបដោយផ្លែផ្កាគួរជាទីមោទនៈ ក្នុងការស្វែងរកផលប្រយោជន៍ជូនពលរដ្ឋ ពិសេសការលើកកម្ពស់សុខសន្តិភាព។

សម្តេចប្រធានរដ្ឋសភា គូសបញ្ជាក់ថា ដំណើរទស្សនកិច្ចនេះ នឹងធ្វើឱ្យចំណងមិត្តភាព កិច្ចសហប្រតិបត្តិការរវាងប្រទេសទំាងពីរកាន់តែជិតស្និទ្ធថែមទៀត ទំាងស្ថាប័ននីតិប្បញ្ញត្តិ និងនីតិប្រតិបត្តិ ទំាងក្នុងក្របខ័ណ្ឌទ្វេភាគី និងពហុភាគី ។

សម្តេច បានអបអរសាទរសភាប្រទេសម៉ាឡេស៊ី ដែលបានចំរៀបមហាសន្និបាតអន្តរសភាអាស៊ាន លើកទី៤៦ ទទួលបានជោគជ័យ នៅក្នុងការលើកកម្ពស់សុខសន្តិភាព វិបុលភាព សហគមន៍អាស៊ានប្រកបដោយចីរភាព និងបរិយាបន្ន។

សម្តេចរដ្ឋសភាធិបតី ឃួន សុដារី បានគូសបញ្ជាក់ថា ក្នុងនាមជាតំណាងប្រជាពលរដ្ឋ សភាមានតួនាទីសំខាន់ ក្នុងការស្វែងរកដោះស្រាយនានាជូនពលរដ្ឋ ធានាសុខសន្តិភាព សុវត្ថិភាពជូនម្ចាស់ឆ្នោត។ ប្រជាជនកម្ពុជា សូមថ្លែងអំណរគុណយ៉ាងជ្រាលជ្រៅជូនចំពោះលោក អាន់វ៉ា អ៊ីប្រាហ៊ីម (Anwar Ibrahim) នាយករដ្ឋមន្ត្រីម៉ាឡេស៊ី ដែលបានសម្របសម្រួលឱ្យមានបទឈប់បាញ់រវាងកម្ពុជា និងថៃ ព្រមទាំងតួនាទីរបស់ម៉ាឡេស៊ី ក្នុងការសម្របសម្រួល និងដឹកនាំក្រុមអ្នកសង្កេតការណ៍អន្តរកាល (IOT) ដើម្បីត្រួតពិនិត្យ និងអនុវត្តឱ្យបានពេញលេញនូវបទឈប់បាញ់។

សម្តេចរដ្ឋសភាធិបតី ឃួន សុដារី បានរំ លឹកថា កម្ពុជាស្រឡាញ់សន្តិភាព ការពារសន្តិភាព ដោយសារកម្ពុជា ធ្លាប់បានឆ្លងកាត់សង្រ្គាម និងបានហែលឆ្លងទុក្ខលំបាកពីសង្រ្គាមអស់ជាច្រើនទសវត្សរ៍មក
ហើយ។ ដូច្នេះ កម្ពុជា មិនចង់ឃើញពលរដ្ឋខ្លួន ឬជាតិសាសន៍ដទៃជួបទុក្ខលំបាកពីសង្រ្គាមទៀតនោះឡើយ។ ដើម្បីសេចក្តីសុខដល់ពលរដ្ឋទំាងសងខាង ក៏ដូចសហគមន៍អាស៊ានទំាងមូល កម្ពុជា ប្រកាន់ខ្ជាប់យ៉ាងម៉ឺងម៉ាត់អនុវត្តបទឈប់បាញ់ដែលសម្រេច បាននៅថ្ងៃទី២៨ ខែកក្កដា ឆ្នាំ ២០២៥ នៅទីក្រុងគូឡាឡាំពួ ក្រោមការដឹកនាំផ្ទាល់របស់នាយករដ្ឋមន្ត្រីម៉ាឡេស៊ី ដែលផ្តួចផ្តើមដោយលោកប្រធានាធិបតីសហរដ្ឋអាមេរិក និងមានការចូលរួមសង្កេតការណ៍ដោយបណ្តាប្រទេសជាមិត្តមានប្រទេសចិនជាដើមនោះ។

សម្តេចប្រធានរដ្ឋសភា បានជម្រាបជូនគណៈប្រតិភូថា កម្ពុជា នៅប្រកាន់ជំហរដោះស្រាយបញ្ហាដោយសន្តិវិធី ប្រើប្រាស់យន្តការដែលមានស្រាប់ គោរពធម្មនុញ្ញអាស៊ាន ធម្មនុញ្ញអង្គការសហប្រជាជាតិ និងច្បាប់អន្តរជាតិ។

លោកបណ្ឌិត ដាតុក វីរ៉ា ម៉ុដ ហាតា ប៊ីនអឹមឌី រ៉ាមលី បានថ្លែងអំណរគុណជូនសម្តេចប្រធានរដ្ឋសភាដែលបានចំណាយពេលវេលាដ៏មមាញឹក ទទួលស្វាគមន៍ និងជួបពិភាក្សាជាមួយគណៈប្រតិភូនៅក្នុងឱកាសនេះ។
លោកបណ្ឌិត បានជម្រាបជូន សម្តេចប្រធានរដ្ឋសភា អំពីលទ្ធផលជាវិជ្ជមានជាច្រើន នៅក្នុងជំនួបពិភាក្សាការងារជាមួយថ្នាក់ដឹកនាំកំពូលរបស់កម្ពុជា មានជំនួបសម្តេចតេជោ ហ៊ុន សែន និងសម្តេចធិបតី ហ៊ុន ម៉ាណែត ធ្វើឱ្យគណៈប្រតិភូ បានយល់កាន់តែច្បាស់ពីជម្លោះព្រំដែនកម្ពុជា និងថៃ។ លោកប្រធានគណៈប្រតិភូ បានគំាទ្រឆន្ទៈមោះមុត និងការចូលរួមរបស់ថ្នាក់ដឹកនាំកម្ពុជា ក្នុងការលើកកម្ពស់សុខសន្តិភាពសម្រាប់ភពផែនដី។

លោកបណ្ឌិត ដាតុក វីរ៉ា ម៉ុដ ហាតា ប៊ីន អឹមឌី រ៉ាមលី បានគូសបញ្ជាក់ថា សហព័ន្ធសភាសន្ដិភាពពិភពលោកនៃសភាម៉ាឡេស៊ី បានតាមដានដោយយកចិត្តទុកដាក់នូវការអនុវត្តបទឈប់បាញ់ ហើយគំាទ្រប្រសាសន៍លើកឡើងរបស់សម្តេចប្រធានរដ្ឋសភា ដែលថាជម្លោះមិនអាចដោះស្រាយដោយសង្រ្គាមនោះទេ មានតែការចរចាទេ ទើបអាចបញ្ចប់សង្រ្គាមបាន។

លោក មានជំនឿមុតមាំថា បញ្ហានេះនឹងដោះស្រាយបានក្នុងពេលឆាប់ៗ។ ជាមួយគ្នានេះ លោកប្រធានគណៈប្រតិភូ បានអប អរសាទរការរីកចម្រើនលើគ្រប់វិស័យរបស់កម្ពុជា។ តាមរយៈការចូលរួមសង្កេតការណ៍ពីការបោះឆ្នោតនៅកម្ពុជា នាពេលកន្លងមក លោកថ្លែងការកោតសរសើរពីដំណើរការលទ្ធិប្រជាធិបតេយ្យនៅកម្ពុជា ដែលមានការបោះឆ្នោតមួយបានប្រព្រឹត្ត ទៅដោយសេរី យុត្តិធម៌ និងតម្លាភាព ពីព្រោះថាសូម្បីបញ្ជីឈ្មោះពលរដ្ឋអ្នក បោះឆ្នោត ក៏មានបិទរូបថត ថែមទៀតផង។ នេះជាចំណុចល្អដែលត្រូវរៀនសូត្រពីកម្ពុជា៕

អត្ថបទ៖ វង សុភ័ក្ត្រ