ទំនប់ចាំក្តាន់ នៅខេត្តព្រៃវែង ដែលមានពពួកសត្វស្លាបជាច្រើនប្រភេទ កំពុងទាក់ទាញភ្ញៀវទេសចរ ទៅលេងកម្សាន្តយ៉ាងច្រើនកុះករនៅថ្ងៃឈប់សម្រាក
ព្រៃវែង៖ ទំនប់ទឹកចាំក្តាន់ បាននិងកំពុងទាក់ទាញភ្ញៀវទេសចរ ទៅលេងកម្សាន្តយ៉ាងច្រើនកុះករនៅថ្ងៃឈប់សម្រាក និងនៅថ្ងៃបុណ្យទាន ដោយសារតែទំនប់នេះ សំបូរទៅដោយពពួកសត្វស្លាបជាច្រើនប្រភេទ ដែលមានចំនួនរាប់ពាន់ក្បាល កំពុងរស់នៅតាមព្រៃរបោះ និងព្រៃរនាមក្នុងដែនទំនប់នេះ។
ទំនប់ទឹកនេះ គឺជាទំនប់ដ៏ធំមួយ ហ៊ុំព័ទ្ធផ្ទៃដីប្រមាណ ១០ហិកតា សម្រាប់ស្តុបទឹកទុកឲ្យប្រជាពលរដ្ឋធ្វើស្រែប្រាំង មានទីតាំងស្ថិតនៅក្នុងឃុំព្រៃព្នៅ ស្រុកពារាំង ខេត្តព្រៃវែង។
អាជ្ញាធរឃុំព្រៃព្នៅ បានឲ្យដឹងថា ទំនប់ចាំក្តាន់នេះ ពីមុនឡើយគេធ្វើសម្រាប់ស្តុបទឹកទុកឲ្យប្រជាពលរដ្ឋប្រើប្រាស់ធ្វើស្រែចម្ការ ក្នុងរដូវប្រាំងប៉ុណ្ណោះ។ ប៉ុន្តែពី១ឆ្នាំទៅ១ឆ្នាំផ្ទៃដីនៅផ្នែកកណ្ដាល បានដុសកើតជាព្រៃរបោះព្រៃរនាមច្រើនទៅៗ ជាហេតុទាក់ទាញឱ្យសត្វស្លាបនាំគ្នាចូលមករស់នៅកើតកូនកើតចៅស្អេកស្កះពេញព្រៃរហូតដល់រាប់រយរាប់ពាន់ក្បាល។
អាជ្ញាធរឃុំព្រៃព្នៅ បានបញ្ជាក់ទៀតថាដោយមើលឃើញតំបន់នេះ មានសត្វស្លាបរស់នៅច្រើន ទើបអាជ្ញាធរឃុំ បានចាត់វិធានការណែនាំឲ្យប្រជាពលរដ្ឋក្នុងមូលដ្ឋានចូលរួមជួយការពារ និងអភិរក្សសត្វស្លាបនៅតំបន់នេះ ដើម្បីប្រែក្លាយតំបន់នេះឲ្យទៅជាតំបន់ទេសចរណ៍ និងអាចទាក់ទាញភ្ញៀវទេសចរជាតិ និងអន្តរជាតិឲ្យមកលេងកម្សាន្តនៅទីនេះឲ្យបានច្រើន។
ដោយឡែក ប្រជាពលរដ្ឋនៅក្នុងតំបន់នេះ ក៏បានបង្ហាញនៅអារម្មណ៍សប្បាយរីករាយផងដែរនៅពេលឃើញវត្តមានសត្វស្លាបគ្រប់ប្រភេទ រស់នៅក្នុងទំនប់ចាំក្តាន់នេះ និងមានភ្ញៀវទេសចរ មកលេងកម្សាន្តនៅតំបន់នេះច្រើន។ ពួកគាត់ បានសំណូមពរឲ្យអាជ្ញាធរជួយរៀបចំកែលម្អតំបន់នេះ ឲ្យទៅជាតំបន់ទេសចរណ៍ធម្មជាតិដ៏ស្រស់ស្អាតមួយដែលអាចទាក់ទាញភ្ញៀវទេសចរ ឱ្យមកលេងកម្សាន្តកាន់តែច្រើនដែលអាចជួយឲ្យពួកគាត់ប្រកបមុខរបររកប្រាក់ចំណូលនៅក្នុងតំបន់នេះបានកាន់តែច្រើនផងដែរ៕
អត្ថបទ៖ មិន ភក្ដី
