ហុងគ្រី៖ ក្នុងឱកាសបំពេញទស្សនកិច្ចផ្លូវការនៅប្រទេសហុងគ្រី សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា បានចូលជួបសម្តែងការគួរសម និងពិភាក្សាការងារជាមួយ លោក តាម៉ាស ស៊ូលយ៉ូក (Tamás Sulyok) ប្រធានាធិបតីហុង គ្រី។  នៅក្នុងឱកាសនោះ សម្តេចប្រធានរដ្ឋសភា និងលោកប្រធានាធិបតី បានពិភាក្សាគ្នាជាច្រើនពីតម្លៃសន្តិភាព។

លោក តាម៉ាស ស៊ូលយ៉ូក (Ta más Sulyok) ប្រធានាធិបតីហុងគ្រី  បានចូលរួមអបអរសាទរកិច្ចព្រមព្រៀងសន្តិភាពរវាងកម្ពុជា និងថៃ ដែលបានចុះ ហត្ថលេខាដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីកម្ពុជា និងនាយករដ្ឋមន្រ្តីប្រទេសថៃ កាលពីថ្ងៃទី២៦ ខែតុលាឆ្នាំ២០២៥នេះ នៅទីក្រុងគូឡាឡំាពួ ប្រទេសម៉ាឡេស៊ី។

លោកប្រធានាធិបតី មានក្តីសង្ឃឹមថា បន្ទាត់ព្រំដែនរវាងប្រទេសកម្ពុជា និងថៃ នឹងវិលទៅប្រក្រតីភាព ហើយប្រជាពលរដ្ឋទំាងសងខាង នឹងរស់នៅដោយសុខសន្តិភាពឡើងវិញក្នុងពេលឆាប់ៗ។

លោកប្រធានាធិបតីហុងគ្រី បានគូសបញ្ជាក់ថា ជាទូទៅពលរដ្ឋ ត្រូវការសន្តិភាព ប៉ុន្តែក្នុងសម័យបច្ចុប្បន្ននេះ ប្រជាពលរដ្ឋ ងាយនឹងរងគ្រោះដោយសារសង្រ្គាមណាស់។ សង្រ្គាមងាយនឹងផ្ទុះឡើង ប៉ុន្តែវាជាការលំបាកបំផុតក្នុងការបញ្ចប់សង្រ្គាម។ ហុងគ្រី ក៏ចង់ឃើញឱ្យមានកិច្ចព្រមព្រៀងសន្តិភាពរវាងរុស្ស៊ី និងអ៊ុយក្រែនផងដែរ។

នៅក្នុងជំនួប សម្តេចរដ្ឋសភាធិបតី បានពំានាំនូវព្រះរាជបណ្តាំសាកសួរសុខទុក្ខរបស់ព្រះករុណាព្រះបាទសម្ដេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា និងការផ្តាំផ្ញើសាកសួរសុខទុក្ខរបស់សម្តេចតេជោ ហ៊ុន សែន ប្រធានព្រឹទ្ធសភា សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី ជូនដល់លោកប្រធានាធិបតីហុងគ្រី។

សម្តេចប្រធានរដ្ឋសភា ក៏បានជម្រាបជូនលោកប្រធានាធិបតី ពីលទ្ធផលដំណើរទស្សនកិច្ចរបស់គណៈប្រតិភូរដ្ឋសភាកម្ពុជា នៅប្រទេសហុងគ្រី ដែលទទួលបានលទ្ធផលជាទីមោទនៈ នៅក្នុងនោះ សម្តេចបានអញ្ជើញទស្សនាសិក្សាស្វែងយល់ពីប្រវត្តិសាស្រ្ត វប្បធម៌ អរិយធម៌ និងជីវភាពរស់នៅរបស់ប្រជាពលរដ្ឋហុងគ្រី និងបានជួបពិភាក្សាការងារជាមួយថ្នាក់ ដឹកនាំប្រទេសហុងគ្រី ប្រកបដោយផ្លែផ្កានៅក្នុងការពង្រឹងកិច្ចសហប្រតិបត្តិការប្រទេសទំាងពីរឱ្យកាន់តែស៊ីជម្រៅបន្ថែមទៀត។

សម្តេចបានគូសបញ្ជាក់ថា នៅក្នុងជំនួបទ្វេភាគីរវាងសម្តេច និងលោក ឡាស្លូ កូវឺរ ប្រធានរដ្ឋសភាហុងគ្រី ថ្នាក់ដឹកនាំរដ្ឋសភាប្រទេសទំាងពីរ បានវាយតម្លៃខ្ពស់ចំពោះចំណងមិត្តភាព និងកិច្ចសហប្រតិបត្តិការប្រទេសទំាងពីរនាពេលកន្លងមក និងទៅអនាគត។ រដ្ឋសភាប្រទេសទំាងពីរ បានចុះហត្ថលេខាលើអនុស្សរណៈនៃការយោគយល់គ្នាទំាងកម្រិតរដ្ឋសភា និងកម្រិតអគ្គលេខាធិការដ្ឋាន។ អនុស្សរណៈទំាងពីរនេះ ជា ឯកសារប្រវត្តិសាស្រ្ត បានបើកទំព័រថ្មីមួយទៀត ដើម្បីបម្រើផលប្រយោជន៍ពលរដ្ឋទំាងសងខាង។

សម្តេចប្រធានរដ្ឋសភា បានស្នើលោកប្រធានាធិបតី ជួយជំរុញសក្តានុពលថ្មីៗ ដែល ប្រទេសទំាងពីរមានដើម្បីផ្តល់ផល ប្រយោជន៍ដល់ប្រជាជននៃប្រទេសទំាងពីរ មានវិស័យពាណិជ្ជកម្ម ទេសចរណ៍ វប្បធម៌ អប់រំ ជាដើម។

ជាការឆ្លើយតប លោក តាម៉ាស ស៊ូលយ៉ូក បានបញ្ជាក់ថា ប្រទេសហុងគ្រី បានត្រៀមជាស្រេចក្នុងការថ្វាយការស្វាគមន៍ព្រះរាជដំណើរទស្សនកិច្ចផ្លូវរដ្ឋ របស់ព្រះករុណាព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា នៅប្រទេសហុងគ្រី ដែលជានិមិត្តរូបដ៏សំខាន់នៃទំនាក់ទំនងដ៏យូរលង់ និងរឹងមាំរវាងប្រទេសទំាងពីរ។

លោកប្រធានាធិបតី បានគំាទ្រការលើកឡើងរបស់សម្តេចប្រធានរដ្ឋសភា និងបានកោតសរសើរចំពោះការរីកចម្រើនរបស់កម្ពុជា ដោយមានជំនឿមុតមាំថា គោលដៅអភិវឌ្ឍន៍របស់កម្ពុជា ឆ្នាំ២០៣០ ក្លាយជាប្រទេសមានចំណូលមធ្យមកម្រិតខ្ពស់ និងប្រទេសមានចំណូលខ្ពស់នៅឆ្នាំ២០៥០ នឹងសម្រេចបានដូចបំណងជាក់ជាមិនខានឡើយ៕

អត្ថបទ៖ វង សុភ័ក្ត្រ