ភ្នំពេញ៖ អនុរដ្ឋមន្ត្រីការបរទេសនៃសាធារណរដ្ឋឥណ្ឌូនេស៊ី លោក មហាម៉ាត់ អានីស ម៉ាត់តា (Muhammad Anis Matta) ដែលទទួលបន្ទុកត្រួតពិនិត្យការចូលរួមរបស់ប្រទេសឥណ្ឌូនេស៊ីជាមួយសហគមន៍មូស្លីមជុំវិញពិភពលោក បានមកទស្សនកិច្ចការងារនៅទីក្រុងភ្នំពេញនៅថ្ងៃទី១ ខែធ្នូ ឆ្នាំ២០២៥ ដើម្បីជំរុញកិច្ចសហប្រតិបត្តិការជាមួយកម្ពុជា។
ក្នុងដំណើរទស្សនកិច្ចការងារនេះ លោកអនុរដ្ឋមន្ត្រី បានជួបពិភាក្សាការងារជាមួយលោក អ៉ឺង រចនា រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិកម្ពុជា និងអ្នកឧកញ៉ា អូស្មាន ហាសាន់ ទេសរដ្ឋមន្ត្រីទទួលបន្ទុកបេសកកម្មពិសេស។
ដំណើរទស្សនកិច្ចការងាររបស់លោកអនុរដ្ឋមន្ត្រី អានីស ម៉ាត់តា គឺដើម្បីស្វែងយល់អំពីប្រទេសកម្ពុជា រួមទាំងសក្តានុពលសម្រាប់ការចូលរួមរបស់ពិភពលោកមូស្លីម ក្នុងការអភិវឌ្ឍជាតិ និងគោលនយោបាយការបរទេស។
ក្នុងអំឡុងពេលជួបជាមួយលោក អ៉ឹង រចនា ភាគីទាំងពីរ បានពិភាក្សាអំពីវិធីពង្រីកកិច្ចសហប្រតិបត្តិការក្នុងវិស័យពាណិជ្ជកម្ម ទេសចរណ៍ និងវិនិយោគ។ ភាគីទាំងពីរ ក៏បានស្វែងយល់ពីកិច្ចសហការក្នុងឧស្សាហកម្មហាឡាល និងការគាំទ្រដល់អាជីវកម្មខ្នាតតូច និងមធ្យមផងដែរ។ លោកអនុរដ្ឋមន្ត្រី Anis Matta បានកត់សម្គាល់ថា ជើងហោះហើរកាន់តែច្រើនពីក្រុមហ៊ុនអាកាសចរណ៍មជ្ឈិមបូព៌ា មកកាន់ប្រទេសកម្ពុជា បង្ហាញពីសារៈសំខាន់កាន់តែខ្លាំងឡើងរបស់ប្រទេសចំពោះប្រទេសភាគច្រើនជាមូស្លីម។
ភាគីទាំងពីរ ក៏បានពិភាក្សាអំពីបញ្ហាពលរដ្ឋឥណ្ឌូនេស៊ីដែលពាក់ព័ន្ធនឹងក្រុមឆបោកតាមអ៊ីនធឺណិតនៅកម្ពុជា និងបានឯកភាពគ្នាថា កិច្ចខិតខំប្រឹងប្រែងរួមគ្នាកាន់តែខ្លាំងឡើងគឺត្រូវការជាចាំបាច់ ដើម្បីប្រយុទ្ធប្រឆាំងនឹងឧក្រិដ្ឋកម្មឆ្លងដែន រួមទាំងការឆបោកតាមអ៊ីនធឺណិតផងដែរ។
ក្នុងអំឡុងពេលពិភាក្សាជាមួយលោកទេសរដ្ឋមន្ត្រី អូស្មាន ហាសាន់, លោកអនុរដ្ឋមន្ត្រី Anis Matta បានសម្តែងការសាទរចំពោះរដ្ឋាភិបាលកម្ពុជាចំពោះការយកចិត្តទុកដាក់ជាបន្តបន្ទាប់ចំពោះសហគមន៍មូស្លីមកម្ពុជា។ ជំនួបនេះ ក៏បានគូសបញ្ជាក់ពីសារៈសំខាន់នៃការបង្កើនចំណងមិត្តភាពរវាងប្រជាជន និងប្រជាជន ជាពិសេសតាមរយៈកិច្ចសហប្រតិបត្តិការអប់រំក្នុងចំណោមសហគមន៍មូស្លីម។
លោកអនុរដ្ឋមន្ត្រី Anis Matta បានលើកទឹកចិត្តនិស្សិតកម្ពុជាកាន់តែច្រើន ឱ្យបន្តការសិក្សាថ្នាក់ឧត្តមសិក្សានៅប្រទេសឥណ្ឌូនេស៊ី ដោយទាញយកអត្ថប្រយោជន៍ពីអាហារូបករណ៍ដែលផ្តល់ដោយរដ្ឋាភិបាលឥណ្ឌូនេស៊ី និងសាកលវិទ្យាល័យឥណ្ឌូនេស៊ី។ លោក ក៏បានលើកឡើងពីគំនិតនៃការបង្កើតមជ្ឈមណ្ឌលឥណ្ឌូនេស៊ីនៅកម្ពុជា ដែលជាវេទិកាមួយ ដើម្បីលើកកម្ពស់ការផ្លាស់ប្តូរវប្បធម៌ និងការអប់រំ។
ដំណើរទស្សនកិច្ចនេះ ត្រូវបានបញ្ចប់ដោយអាហារពេលល្ងាចដែលរៀបចំដោយស្ថានទូតឥណ្ឌូនេស៊ី ដែលមានការចូលរួមពីមេដឹកនាំប្រហែល ២៥នាក់នៃសហគមន៍មូស្លីមកម្ពុជា រួមទាំងសមាជិកព្រឹទ្ធសភា សមាជិកសភា និងមន្ត្រីជាន់ខ្ពស់។ លោកអនុរដ្ឋមន្ត្រី Anis Matta បានពិពណ៌នាអំពីព្រឹត្តិការណ៍នេះថា ជាពេលវេលាដ៏មានតម្លៃនៃ silaturahim ជាមធ្យោបាយមួយដើម្បីពង្រឹងទំនាក់ទំនងដ៏កក់ក្តៅ និងយូរអង្វែង៕