ឧត្តរមានជ័យ៖​ មជ្ឈមណ្ឌលសកម្មភាពកំចាត់មីនកម្ពុជា CMAC) បានសម្រេចដាក់​ ភូមិផ្អុង សង្កាត់កូនក្រៀល ក្រុងសំរោង ខេត្តឧត្តរមានជ័យ ជាតំបន់គ្រោះថ្នាក់ ក្រោយរកឃើញគ្រាប់បែកចង្កោមដែលថៃបានផ្លោង​ និងគ្រាប់ទម្លាក់ពីលើយន្តហោះ អំឡុងពេលយោធាថៃបើកការឈ្លានពានមកលើបូរណភាពទឹកដីកម្ពុជា កាលពីថ្ងៃទី៨ ដល់ថ្ងៃទី២៧ ខែធ្នូ ឆ្នាំ២០២៥​ ហេីយបច្ចុប្បន្នបាននៅរាយប៉ាយ​លើដីភូមិឋាន ដីស្រែចម្ការ និងនៅតាមទីសាធារណៈនានា។

លោក ជិន ប៊ុនហឿត អនុប្រធានកងឯកភាពកម្ចាត់មីនទិសឧត្តរមាន័យ បានឱ្យដឹងនៅថ្ងៃទី៥ ខែកុម្ភៈ​ ឆ្នាំ២០២៦​ ថា ខេត្តឧត្តរមានជ័យ បានរងផលប៉ះពាល់ពីគ្រាប់បែកចង្កោម ដែលទម្លាក់ពីលើយន្តហោះ និងការបាញ់ផ្លោងរបស់យោធាថៃធំធេងជាងគេ ដោយចំនួនមិនអាចគណនាបានទេខណៈគ្រាប់មួយចំនួនត្រូវបានរកឃើញ និងមួយចំនួនទៀតមិនទាន់បានរកឃើញនៅឡើយ។ លោកថា​ ចាប់ពីថ្ងៃទី១ ខែមករា ឆ្នាំ២០២៥ ដល់បច្ចុប្បន្ន ក្រុមជំនាញរបស់ស៊ីម៉ាក់ បានចុះហ៊ុព័ទ្ធតំបន់គ្រោះថ្នាក់មានគ្រាប់បែកចង្កោមចំនួន​ ១.៩០៦ទីតាំង ក្នុងនោះរកឃើញគ្រាប់នៅលើដីចំនួន​ ១៣០ទីតាំង, គ្រាប់លិចកប់ក្នុងដីចំនួន ១២៧ទីតាំង, រណ្ដៅគ្រាប់ចំនួន ១.៦៤៩រណ្ដៅ។ ទីតាំងទាំងនោះមានទាំងក្នុងផ្ទះ និងភូមិឋានរបស់ប្រជាពលរដ្ឋ សាលារៀន វត្តអារាម ស្រែចម្ការ និងទីតាំងសាធារណៈនានាជាច្រេីនទៀត។

មន្ត្រីស៊ីម៉ាក់រូបនេះ បានបន្តទៀតថា ភូមិឋានរបស់ប្រជាពលរដ្ឋចំនួន​ ១៤០ភូមិ ត្រូវបានកំណត់ជាតំបន់គ្រោះថ្នាក់ និងចងខ្សែហ៊ុមព័ទ្ធ រួមមាន​ ភូមិផ្អុង សង្កាត់កូនក្រៀល ក្រុងសំរោង ខេត្តឧត្តរមានជ័យ សម្រេចដាក់ក្នុងតំបន់គ្រោះថ្នាក់ ខណៈសាលារៀនរងផលប៉ះពាល់ចំនួន​ ៧កន្លែងបានធ្វើការបោសសម្អាតរួចរួចរាល់ និងនៅតាមទីតាំងផ្សេងៗ នឹងធ្វើការបោសសំអាតជាបន្តបន្ទាប់ទៀត។

បេីតាម​លោក ជិន ប៊ុនហឿត​ ការប្រើប្រាស់គ្រាប់បែកចង្កោមដោយយោធាថៃមកឈ្លានពានទឹកដីកម្ពុជានេះ ជាការរំលោភអនុសញ្ញាស្តីពីគ្រាប់បែកចង្កោម ដែលហាមឃាត់ការប្រើប្រាស់ ការផលិត ការផ្ទេរ និងការស្តុកទុក ដោយសារតែគ្រាប់បែកចង្កោម ជាអាវុធដ៏គ្រោះថ្នាក់បង្កផលប៉ះពាល់ធ្ងន់ធ្ងរដល់ជនស៊ីវិល៕