សហរដ្ឋអាម៉េរិក៖ អ្នកនាំពាក្យរងនៃក្រសួងការបរទេសអាម៉េរិក លោក Tommy Pigott បានចេញសេចក្តីថ្លែងការណ៍ថា អនុរដ្ឋលេខាធិការក្រសួងការបរទេសអាម៉េរិក លោក Christopher Landau បានជួបពិភាក្សាការងារជាមួយនាយករដ្ឋមន្ត្រីកម្ពុជា សម្តេចមហាបវរធិបតី ហ៊ុន ម៉ាណែត នៅថ្ងៃសុក្រនេះ នាទីក្រុងវ៉ាស៊ីនតោន ក្នុងអំឡុងកិច្ចប្រជុំក្រុមប្រឹក្សាសន្តិភាព (Board of Peace)។

ក្នុងជំនួបនោះ លោកអនុរដ្ឋលេខាធិការ Landau និងសម្តេចបវរធិបតី ហ៊ុន ម៉ាណែត បានសម្តែងនូវការអបអរសាទរចំពោះភាពជាដៃគូទ្វេភាគីដែលកំពុងរីកចម្រើនរវាងសហរដ្ឋអាម៉េរិក និងកម្ពុជា។

ភាគីទាំងពីរក៏បានពិភាក្សាលើប្រធានបទសំខាន់ៗជាច្រើន រួមមាន ពិភាក្សាពីស្ថានភាព និងកិច្ចសហប្រតិបត្តិការតំបន់ព្រំដែន, រួមគ្នាបង្ក្រាបប្រតិបត្តិការឆបោកដែលកំណត់គោលដៅលើពលរដ្ឋអាម៉េរិក, ពង្រឹងចំណងមិត្តភាពលើវិស័យយោធា និងសន្តិសុខ ក៏ដូចជាការស្វែងរកលទ្ធភាពពង្រីកសេដ្ឋកិច្ចរវាងប្រទេសទាំងពីរ។

ទន្ទឹមនឹងនេះ លោកអនុរដ្ឋលេខាធិការ Landau បានសម្តែងនូវការកោតសរសើរចំពោះការសម្រេចចិត្តរបស់សម្តេចបវរធិបតី ហ៊ុន ម៉ាណែត ក្នុងការចូលរួមជាសមាជិកស្ថាបនិកនៃក្រុមប្រឹក្សាសន្តិភាព និងការចូលរួមចំណែកក្នុងកិច្ចខិតខំប្រឹងប្រែងរបស់សហគមន៍អន្តរជាតិ ដើម្បីលើកកម្ពស់សន្តិភាពនៅតំបន់ហ្គាហ្សា (Gaza) និងតំបន់ផ្សេងៗទៀត៕

អត្ថបទ៖ CNC
ប្រភព៖ Facebook page U.S Mission to ASEAN (USASEAN)