កំពង់ស្ពឺ៖​ ករណីសិស្សនៃវិទ្យាល័យ ហ៊ុន សែន រលាំងឈូកដែលបានដួលសន្លប់ ហើយបញ្ជូនទៅសង្គ្រោះបន្ទាន់នៅមន្ទីរពេទ្យបង្អែកខេត្តកំពង់ស្ពឺ​ បានធូរស្បើយ​ និងបានវិលត្រលប់ទៅគេហដ្ឋានរៀងខ្លួនអស់ហើយ។ នេះបើតាមការឱ្យដឹងពីលោកវេជ្ជបណ្ឌិត ហុក គ្រី ប្រធានមន្ទីរសុខាភិបាល​ខេត្តកំពង់ស្ពឺ​ នៅយប់ថ្ងៃម៉ោង​ ៧:១៣នាទី​ ថ្ងៃទី២ ខែមីនា ឆ្នាំ២០២៦។

លោកវេជ្ជបណ្ឌិត ហុក គ្រី បានឱ្យដឹងថា​ នៅរសៀលថ្ងៃទី ២ ខែកុម្ភៈ ឆ្នាំ២០២៦​ មានករណីសិស្សសាលា វិទ្យាល័យហ៊ុន​ សែន​ រលាំងឈូកបានដួលសន្លប់ចំនួន​១៦នាក់(ស្រី១៥នាក់) ពេលកំពុងរៀន ហើយបានបញ្ជូនភ្លាមៗមកកាន់មន្ទីរពេទ្យបង្អែកដើម្បីសង្គ្រោះបន្ទាន់។​ ក្រោមការយកចិត្តទុកដាក់ពីក្រុមគ្រូពេទ្យក្នុងការព្យាបាល សិស្សទាំងអស់បានធូរស្បើយវិញហើយគិតត្រឹមម៉ោង៦ល្ងាចថ្ងៃទី២ ខែមីនា ឆ្នាំ២០២៦។

លោកវេជ្ជបណ្ឌិត ហុក គ្រី បានបញ្ជាក់ឱ្យដឹងផងដែរថា
មូលហេតុដែលបណ្ដាលឱ្យសិស្សនៃវិទ្យាល័យ ហ៊ុន សែន រលាំងឈូក មានបញ្ហាសុខភាពដួលសន្លប់បន្តបន្ទាប់នេះគឺបណ្ដាលមកពីបញ្ហាអាកាសធាតុក្តៅ ខ្វះអុកស៊ីសែន និងបញ្ហាផ្លូវអារម្មណ៍ទើបបណ្តាលឱ្យដួលតាមគ្នា។​ តែបច្ចុប្បន្នពួកគេបានវិលត្រឡប់ទៅផ្ទះអស់ហើយ៕


អត្ថបទ៖​ ប៊ុត សារុន