កណ្តាល៖ មានករណីលិចទូកស្មាច់ ដែលផ្ទុកមនុស្សសរុប ១៣នាក់ ក្នុងនោះ បណ្តាលឱ្យមានអ្នកស្លាប់ អ្នកបាត់ខ្លួន និងអ្នករងគ្រោះបញ្ជូនទៅមន្ទីរពេទ្យ។ ហេតុការណ៍ដ៏អកុសលនេះ បានកើតឡើង កាលពីវេលាម៉ោង ១០និង៣០នាទី ថ្ងៃទី២៣ខែមីនាឆ្នាំ២០២៦ នៅចំណុចភូមិក្បាលកោះ សង្កាត់កោះដាច់ ខណ្ឌជ្រោយចង្វា រាជធានីភ្នំពេញ ព្រំប្រទល់ជាមួយឃុំពុកឬស្សី ស្រុកខ្សាច់កណ្តាល ខេត្តកណ្តាល។

សមត្ថកិច្ចមូលដ្ឋាន បានប្រាប់ឱ្យដឹងថា មានអ្នកស្លាប់ ២នាក់ ជាមនុស្សស្រី និងបាត់ខ្លួនមនុស្ស ៦នាក់(ប្រុស ៣ និងស្រី ៣នាក់) ជួយសង្រ្គោះបានមនុស្ស ៥នាក់ រួមមាន ១-ឈ្មោះ ហ៊ឹម សោ ភេទស្រីអាយុ ៦៧ឆ្នាំ មានទីលំនៅភូមិស្វាយជ្រុំឃុំរលាប្អៀរ ស្រុករលាប្អៀរ ខេត្តកំពង់ឆ្នាំង(ស្លាប់) រកឃើញសព, ២-ឈ្មោះហាក់ ពេជ្រ ភេទស្រីអាយុ ៤៤ឆ្នាំ នៅភូមិព្រៃក្ដួចឃុំត្រពាំងក្រញូង ស្រុកត្រាំកក់ខេត្តតាកែវ (ស្លាប់) រកឃើញសព។ ៣-កុមារី ឈ្មោះ ធន់ស្រីពេជ្រ អាយុ ៥ឆ្នាំ, ៤-កុមារី ឈ្មោះ វុន កញ្ញា អាយុ ៨ឆ្នាំ, ៥- កុមារា ឈ្មោះ វុន បញ្ញាអាយុ ៦ឆ្នាំ, ៦-កុមារា ឈ្មោះ វុន វិច្ឆិកា អាយុ ៦ឆ្នាំ , ដោយកុមារា កុមារីទាំង ៤នាក់ រស់នៅជាមួយគ្នា ក្នុងភូមិពុកឬស្សីកណ្តាល ឃុំពុកឬស្សី ស្រុកខ្សាច់កណ្តាល ខេត្តកណ្តាល (បាត់ខ្លួន)។ ៧-ឈ្មោះ ស៊ុន ស្រីសឿន ភេទស្រី អាយុ ៣៥ឆ្នាំ នៅភូមិស្វាយជ្រុំ ឃុំរលាប្អៀរ ស្រុករលាប្អៀរ ខេត្តកំពង់ឆ្នាំង (បាត់ខ្លួន), ៨-កុមារា ឈ្មោះ ដា លិ អាយុ ៦ឆ្នាំ នៅភូមិព្រៃក្ដួច ឃុំត្រពាំងក្រយូង ស្រុកត្រាំកក់ខេត្តតាកែវ (បាត់ខ្លួន), ៩-ឈ្មោះ មាស សារ៉េត ភេទស្រីអាយុ៥៩ឆ្នាំ,១០- ឈ្មោះ ចិន ចិត្រា ភេទប្រុស អាយុ៣៨ឆ្នាំ ,១១-កុមារា ឈ្មោះ វុន សុខគា អាយុ៩ឆ្នាំ អ្នកទាំងបី រស់នៅភូមិពុកឬស្សីក្រោម ឃុំពុកឬស្សី ស្រុកខ្សាច់កណ្តាល ខេត្តកណ្ដាល (រងគ្រោះ-សម្រាកព្យាបាលនៅមណ្ឌលសុខភាពកោះដាច់)។ ១២-ឈ្មោះ ចាន់ សុជាតិ ភេទស្រីអាយុ៤៩ឆ្នាំ, ១៣-ឈ្មោះ តន់ វុន ភេទស្រីអាយុ៤២ឆ្នាំ អ្នកទាំងពីររស់ នៅភូមិស្វាយជ្រុំ ឃុំរលាប្អៀ ស្រុករលាកប្អៀ ខេត្តកំពង់ឆ្នាំង។(រងគ្រោះសម្រាប់ព្យាបាលនៅមណ្ឌលសុខភាពកោះដាច់)។

ដោយឡែក ឈ្មោះ ខុំ ឃាន់ ភេទប្រុសអាយុ៤៥ឆ្នាំ នៅភូមិពុកឫស្សីកណ្ដាល ឃុំពុកឫស្សី ស្រុកខ្សាច់កណ្ដាល ខេត្តកណ្ដាល ជាអ្នកបើកបរទូកស្មាច់ដឹកជនរងគ្រោះ ពុំមានរងរបួសទេ។
សមត្ថកិច្ច កំពុងបន្តស្វែងរក ជនរងគ្រោះដែលបាត់ខ្លួនទាំង ៦នាក់ នៅក្នុងទន្លេមេគង្គលើ។

តាមសេចក្តីសន្និដ្ឋានរបស់សមត្ថកិច្ច គឹបណ្ដាលមកអ្នកបើកបរទូកស្មាច់ ផ្ទុកមនុស្សលើសចំណុះ ខ្វះការប្រុងប្រយ័ត្ន៕

អត្ថបទ៖ ឈុន សុភ័ក្រ