ស្ទឹងត្រែង៖ ប្រធានមន្ទីរទេសចរណ៍ខេត្តស្ទឹងត្រែង លោក អ៊ន់ ប៉ោសឿន បានឲ្យដឹងថា ចំនួនភ្ញៀវទេសចរបានទៅលេងកម្សាន្តនៅខេត្តស្ទឹងត្រែង ក្នុងថ្ងៃចូលឆ្នាំទី២ ត្រូវនឹងថ្ងៃទី១៥ ខែមេសា ឆ្នាំ២០២៦ មានចំនួន ៨៥,៦៣០នាក់ កើនឡើងចំនួន ៣,០៩៩នាក់ ស្មើនឹង២៦ភាគរយ។

លោក អ៊ន់ ប៉ោសឿន បានបញ្ជាក់ថា ការកើនឡើងភ្ញៀវទេសចរបែបនេះ ដោយសារតែឆ្នាំថ្មីនេះ រដ្ឋបាលខេត្តក្រោមការដឹកនាំដោយ លោក សរ សុពុត្រា អភិបាលខេត្ត បានរៀបចំនូវផ្ទាំងទស្សនីយភាពកម្សាន្តសប្បាយៗជាច្រើនជូនពលរដ្ឋបានទស្សនា និងលេងកម្សាន្ត។ ក្នុងចំណោមភ្ញៀវទេសចរទាំងអស់ មានភ្ញៀវទេសចរជាតិចំនួន ៨៥,៦១០នាក់ កើនឡើង ៣,០៩៧នាក់ ស្មើនឹង ៤ភាគរយ ភ្ញៀវទេសចរបរទេសចំនួន ២០នាក់ កើនឡើង ៥នាក់ ស្មើនឹង ៣៣ភាគរយ។

សូមជម្រាបថា យោងតាមហ្វេសប៊ុករបស់លោក សរ សុពុត្រា អភិបាលខេត្តស្ទឹងត្រែង នៅយប់ថ្ងៃទី១៦ ខែមេសា ជាថ្ងៃបញ្ចប់កម្មវិធីចូលឆ្នាំ នឹងមានក្រុមល្ខោនបាសាក់សម្តែងរឿង «ម៉ាក់ភូយុងកែវ» ជូនទស្សនាពេញមួយរាត្រី នៅទីលានតេជោ-ធិបតី មុខសាលាខេត្តស្ទឹងត្រែង ផងដែរ៕

ដោយ៖ ម៉ាក មេតា