ស្វាយរៀង៖ គម្រោងកែលម្អផ្លូវក្រាលថ្មបំបែក ៣ខ្សែ និងផ្លូវដី ១ខ្សែ ត្រូវបានដាក់ឱ្យដេញថ្លៃជាផ្លូវការ នៅសាលាឃុំគគីរ ស្រុករមាសហែក ខណៈលទ្ធផល គឺបានទៅក្រុមហ៊ុន ដែលបានដាក់តម្លៃក្រោម ៣០ភាគរយ បង្កឱ្យមានការបារម្ភពីគុណភាពនៃការសាងសង់។

លោកប្រធានក្រុមប្រឹក្សាឃុំ និងជាប្រធានលទ្ធកម្មឃុំគគីរ បានប្រាប់អ្នកសារព័ត៌មានថា មានការរៀបចំដាក់ដេញថ្លៃគម្រោងកែលម្អផ្លូវក្រាលថ្មបំបែកចំនួន ៣ខ្សែ និងជួសជុលផ្លូវដី ១ខ្សែ ក្នុងនោះរួមមាន ទី១-ឃុំគគីរ បានដាក់គម្រោងដេញថ្លៃកែលម្អផ្លូវដី ក្រាលថ្មបំបែក ១ខ្សែ ប្រវែង ២,៤៨៥ម៉ែត្រ តម្លៃប៉ាន់ស្មាន ២០៧,៥៧៥,៤៨៧រៀល មានក្រុមហ៊ុនចូលរួមដាក់ដេញថ្លៃ ៧ក្រុមហ៊ុន។ ជាលទ្ធផល បានទៅលើក្រុមហ៊ុន ឈឹម ម៉ាលី ខនស្ត្រាក់សិន ដាក់តម្លៃ ៥៥,៤១៦,៥០០រៀល គឺតម្លៃទាបអាចទទួលយកបាន។

ទី២-ឃុំរដ្ឋបាលឃុំអំពឹល គម្រោងកែលម្អផ្លូវដីក្រាលថ្មបំបែកប្រវែង ១,៣៧០ម៉ែត្រ តម្លៃប៉ាន់ស្មាន ១១៣,៨២៤,៣២០រៀល មានក្រុមហ៊ុន ៨ ចូលដាក់ដេញថ្លៃ។ ជាលទ្ធផលបានទៅក្រុមហ៊ុន ឈឹម ម៉ាលី ខន់ស្ត្រាក់សិន ដាក់តម្លៃ ២៩,៧៣០,០០០រៀល តម្លៃទាបអាចទទួលយកបាន។

ទី៣-រដ្ឋបាលឃុំអណ្តូងត្របែក គម្រោងកែលម្អផ្លូវដីក្រាលថ្មបំបែក ១ខ្សែ ប្រវែង ២,៣១០ម៉ែត្រ តម្លៃប៉ាន់ស្មាន ១៨៩,៩៧៩,២៥៥រៀល មានក្រុមហ៊ុនដាក់ដេញថ្លៃ ៧ក្រុមហ៊ុន លទ្ធផលបានទៅលើក្រុមហ៊ុន ឈឹ មម៉ាលី ខន់ស្រ្តាក់សិន ដាក់តម្លៃ ៥១,៧៤៥,០០០រៀល តម្លៃទាបអាចទទួលយកបាន(ក្រោម៣០%)។

ទី៤-គម្រោងជួសជុលផ្លូវដី ១ខ្សែ ប្រវែង ១,០៥០ម៉ែត្រ តម្លៃប៉ាន់ស្មាន ៣៤,៧៥៦,៥៦០រៀល មានក្រុមហ៊ុនដាក់ដេញថ្លៃ ៧ក្រុមហ៊ុន។ ជាលទ្ធផល បានទៅក្រុមហ៊ុន ឈឹម ម៉ាលី ខន់ស្ត្រាក់សិន ដាក់តម្លៃ១២,០៧៦,០០០រៀល (តម្លៃទាបអាចទទួលយកបាន)។

លោកប្រធានលទ្ធកម្មឃុំគគីរ បន្តទៀតថា ក្នុងនាមតំណាងឱ្យប្រជាពលរដ្ឋ គឺត្រេកអរជាខ្លាំង ដោយគម្រោងកែលម្អផ្លូវទាំង ៤ខ្សែនេះ ត្រូវបានដាក់ដេញថ្លៃ ហើយមានក្រុមហ៊ុនជាច្រើន បានមកចូលរួមដាក់ដេញថ្លៃ។ ក្រុមការងារទាំង ៣ឃុំ រីករាយចំពោះដំណើរការដាក់ដេញថ្លៃ នៅព្រឹកថ្ងៃ២៧ ខែមេសា២០២៦នេះ ហើយលទ្ធផល ក្រុមហ៊ុនដែលទទួល គឺបានការដាក់តម្លៃទាបរហូតក្រោម ៣០ភាគរយ។

ក្នុងឱកាសដេញថ្លៃនោះដែរ មន្ត្រីលទ្ធកម្មស្រុករមាសហែក ក៏បានណែនាំដល់ក្រុមហ៊ុនដែលចូលរួមដាក់ដេញថ្លៃ ត្រូវគោរពគោលការណ៍បច្ចេកទេសនៃកិច្ចសន្យា និងត្រូវអនុវត្តគម្រោងទៅតាមស្តង់ដាបច្ចេកទេស និងមានគុណភាព។
ដោយសារតែតម្លៃនៃការសាងសង់ផ្លូវទាំង ៤ខ្សែនេះ ទាបជាង ៣០ភាគរយនៃតម្លៃប៉ាន់ស្មាន ធ្វើឱ្យមហាជនព្រួយបារម្ភអំពីគុណភាពផ្លូវ ខ្លាចមិនត្រឹមត្រូវតាមស្តង់ដាបច្ចេកទេស និងបានស្នើសុំឲ្យម្ចាស់គម្រោង និងមន្ត្រីលទ្ធកម្មខេត្តស្វាយរៀង បន្តតាមដានគ្រប់ដំណើរការអនុវត្តគម្រោង ដើម្បីទទួលផ្លូវដែលមានគុណភាព ហើយថវិកានៅសល់ទាំង ៤គម្រោង គួរតែដាក់ដេញថ្លៃសម្រាប់កែលម្អផ្លូវ ដែលត្រូវកែលម្អនៅទីតាំងផ្សេងទៀត៕
អត្ថបទ៖ មិន ភក្តី