ភ្នំពេញ៖ ក្រសួងសុខាភិបាល នាថ្ងៃទី១១ ខែមិថុនា ឆ្នាំ២០២៦ បានរៀបចំវគ្គបណ្តុះបណ្តាលដ៏មានសារៈសំខាន់មួយស្តីពី «បដិសណ្ឋារកិច្ចរបស់វេជ្ជបណ្ឌិត ចំពោះអ្នកជំងឺប្រកបដោយសីលធម៌វិជ្ជាជីវៈ ជាគុណតម្លៃនៃសេវាសុខាភិបាល» ក្រោមអធិបតីភាពរបស់ លោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល។ វគ្គបណ្តុះបណ្តាលនេះរៀបចំឡើងនៅមន្ទីរពេទ្យកាល់ម៉ែត ដោយមានការចូលរួមផ្ទាល់ និងតាមរយៈប្រព័ន្ធសន្និសីទវីដេអូ (Zoom) ពីសំណាក់ថ្នាក់ដឹកនាំក្រសួងសុខាភិបាល ប្រធានមន្ទីរពេទ្យជាតិទាំង១១ ប្រធានមន្ទីរសុខាភិបាលរាជធានី-ខេត្ត ព្រមទាំងមន្ត្រីរាជការ និងបុគ្គលិកសុខាភិបាលយ៉ាងច្រើនកុះករ ។

លោកសាស្ត្រាចារ្យ ឈាង រ៉ា បានសង្កត់ធ្ងន់ថា បច្ចុប្បន្នរាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា កំពុងយកចិត្តទុកដាក់ខ្ពស់បំផុតលើការអនុវត្ត «បដិសណ្ឋារកិច្ចល្អ» ក្នុងគ្រប់វិស័យ ជាពិសេសវិស័យសុខាភិបាល ស្របតាមគោលការណ៍អាទិភាព «មិនបោះបង់ពលរដ្ឋណាម្នាក់» ។

លោករដ្ឋមន្ត្រីបានបញ្ជាក់ថា «ពាក្យ "បដិសណ្ឋារកិច្ច" គឺកិច្ចសំដែងនូវការទទួលរាក់ទាក់ ដែលទាមទារឱ្យមានការចាត់ចែងការងារប្រទាក់ក្រឡាគ្នា ចាប់ពីការរៀបចំទីតាំងផ្តល់សេវាឱ្យងាយស្រួល រហូតដល់ឥរិយាបថ ពាក្យសម្តីរួសរាយ មិនរើសអើង និងការទទួលខុសត្រូវខ្ពស់របស់អ្នកផ្តល់សេវា» ។

វគ្គបណ្តុះបណ្តាលនេះ ទទួលបានការធ្វើឧទ្ទេសនាមដោយ លោក សេង យូអ៊ាវ ដោយផ្តោតលើការប្រែរក្លាយផ្នត់គំនិតបុគ្គលិកសុខាភិបាលពី «អ្នកគ្រប់គ្រងទៅជាអ្នកផ្តល់សេវា» និងពង្រឹងជំនាញទន់ បន្ថែមលើជំនាញបច្ចេកទេសព្យាបាល ដោយមានស្តង់ដារនៃការអនុវត្តសេវាកម្មស្នូលទាំង ១០ចំណុច ត្រូវបានដាក់ចេញដើម្បីឱ្យបុគ្គលិកគ្រប់លំដាប់ថ្នាក់យកទៅអនុវត្ត រួមមាន៖ ការគោរព, ជំនាញក្នុងការស្តាប់, ការយល់ចិត្ត, ការទំនាក់ទំនង, ការគ្រប់គ្រងខ្លួនឯង, ភាពវិជ្ជមាន, ការដោះស្រាយបញ្ហា, មិនលាយឡំរឿងបុគ្គល, ការទទួលខុសត្រូវ និងភាពស្មោះត្រង់។

លោករដ្ឋមន្ត្រី ឈាង រ៉ា បានសម្តែងនូវក្តីសង្ឃឹមយ៉ាងមុតមាំថា ថ្នាក់ដឹកនាំ និងមន្ត្រី-បុគ្គលិកសុខាភិបាលទាំងអស់ នឹងយកចំណេះដឹង និងបទពិសោធន៍ទាំងនេះទៅអនុវត្តក្នុងកិច្ចការប្រចាំថ្ងៃ ដើម្បីលើកកម្ពស់កិត្តិយស កេរ្តិ៍ឈ្មោះ និងសេចក្តីថ្លៃថ្នូររបស់ «កងទ័ពអាវស» ឱ្យកាន់តែល្បីល្បាញ និងទទួលបានការជឿទុកចិត្តកាន់តែខ្លាំងពីសំណាក់ប្រជាពលរដ្ឋ៕

អត្ថបទ៖ សន ពិសិដ្ឋ រូបភាព៖ កែវ ភិរុណ