ពោធិ៍សាត់៖ សហគមន៍តំបន់ការពារធម្មជាតិ ក្នុងខេត្តពោធិ៍សាត់ និងក្លាយជាម្ចាស់គម្រោងដាំស្មៅយក្សគំរូ ដំបូងគេ ដែលមានប្រយោជន៍សំខាន់មិនត្រឹមតែចូលរួមចំណែកទប់ស្កាត់ការកាប់ព្រៃឈើ និងថែមទាំងជួយលើកកម្ពស់ជីវភាពសហគមន៍មូលដ្ឋាន។

លោក អ៊ាង សុផល្លែត រដ្ឋមន្រ្តីក្រសួងបរិស្ថាន ក្នុងពិធីដាំដើមឈើក្រោមប្រធានបទ «រួមគ្នាដាំដើមឈើ ដើម្បីកម្ពុជាបៃតង» នៅបរិវេណផ្លូវចូលបូជនីយដ្ឋាន ទេពឧកញ៉ា ឃ្លាំង មឿង និងលោកជំទាវ ខាន់ ខៀវ ក្នុងខេត្តពោធិ៍សាត់ នាព្រឹកថ្ងៃទី១៩ ខែមិថុនា ឆ្នាំ២០២៦ បានលេីកឡេីងថា ការដាំស្មៅយក្សបង្កើតប្រភពចំណូលបន្ថែម ប្រើប្រាស់ជាប្រភពថាមពលជំនួសដ៏មានប្រសិទ្ធភាព ដែលជួយបញ្ឈប់ការចូលកាប់ឈើធម្មជាតិក្នុងតំបន់ការពារធម្មជាតិ យកមកធ្វើជាអុស និងធ្យូង។ ជាមួយគ្នានេះ ការដាំស្មៅយក្ស ជួយលើកកម្ពស់ជីវភាពសហគមន៍មូលដ្ឋាន បង្កើតប្រភពចំណូលបន្ថែម និងឆ្លើយតបនឹងការអនុវត្តយុទ្ធសាស្រ្តចក្រាវិស័យបរិស្ថាន ការបង្កើនគម្របបៃតងនៅទូទាំងប្រទេសកម្ពុជា បន្ថែមពីលើ យុទ្ធនាការ «ពន្លកបៃតង (https://www.khmertimeskh.com/501919709/%E1%9E%80%E1%9E%9A%E1%9E%9F%E1%9E%84%E1%9E%94%E1%9E%9A%E1%9E%9F%E1%9E%90%E1%9E%93%E1%9E%A2%E1%9E%96%E1%9E%9C%E1%9E%93%E1%9E%9C-3/)» ដែលក្រសួងបរិស្ថាន បាននិងកំពុងចែកកូនឈើឱ្យសាធារណជនយកទៅដាំរាប់លានដើមជារៀងរាល់ឆ្នាំ។ រាជរដ្ឋាភិបាលកម្ពុជា បានយកចិត្តទុកដាក់ទៅលើ ជីវភាពសហគមន៍មូលដ្ឋាន តាមរយៈការផ្តល់ការអភិវឌ្ឍ នៅតាមមូលដ្ឋាន ដើម្បីបង្កើនចំណូល ហើយក៏ជាការរួមចំណែកសំខាន់ដល់ការអភិរក្សព្រៃឈើផងដែរ។
 
សូមបញ្ជាក់ថា ក្រសួងបរិស្ថានបន្តពង្រឹងសហការជាមួយសមត្ថកិច្ចពាក់ព័ន្ធ រដ្ឋបាលមូលដ្ឋានគ្រប់ថ្នាក់និងប្រជាពលរដ្ឋ អនុវត្តច្បាប់តឹងរឹង បានដាក់បញ្ជាយ៉ាងម៉ឺងម៉ាត់ ឱ្យមន្ត្រីជំនាញស្រាវជ្រាវរកមុខសញ្ញា និងព្រមានចាត់វិធានការច្បាប់ដ៏តឹងរ៉ឹងទៅតាម ក្រមបរិស្ថាន និងធនធានធម្មជាតិ ចំពោះបទល្មើសធនធានធម្មជាតិ។ ក្រសួងបរិស្ថានបន្តជំរុញការបណ្តុះបណ្តាល ពង្រឹងសមត្ថភាពការប្រើប្រាស់បច្ចេកវិទ្យាថ្មី និងការគាំទ្រសម្ភារដល់មន្រ្តីឧទ្យានុរក្ស និងអាជ្ញាធរថ្នាក់ក្រោមជាតិ និងប្រជាសហគមន៍នៅតាមតំបន់ការពារធម្មជាតិ។ លើសពីនេះ ក្រសួងបរិស្ថាន កំពុងជំរុញ យុទ្ធនាការ «ពន្លកបៃតង» ដើម្បីចែកកូនឈើដល់ពលរដ្ឋដោយឥតគិតថ្លៃ ក្នុងការស្តារ និងពង្រីកគម្របបៃតងនៅកម្ពុជា។ ទន្ទឹមនឹងនេះ ក្រសួងជំរុញការការលើកកម្ពស់ជីវភាពសហគមន៍ ជំរុញឱ្យសហគមន៍ចូលរួមការពារព្រៃឈើ ដើម្បីលើកកម្ពស់ធនធានកាបូន ដើម្បីទាញយកឥណទាន រួមចំណែកអភិវឌ្ឍណ័ជីវភាពសហគមន៍ និងជួយបង្កើតជម្រើសមុខរបរថ្មី ជំនួសការពឹងផ្អែកលើព្រៃឈើទាំងស្រុង ដោយការអភិវឌ្ឍគោលដៅលំហែបៃតង (Eco-Tourism) និងបន្តចែកពូជសត្វ និងដំណាំ និងពូជបន្លែចម្រុះ ព្រមទាំងបច្ចេកទេសចិញ្ចឹម ដើម្បីឱ្យពលរដ្ឋមានប្រភពចំណូល និងស្បៀងអាហារប្រចាំថ្ងៃនៅផ្ទះ និងការអភិវឌ្ឍជីវភាពសហគមន៍ តាមរយៈគម្រោងដាំស្មៅយក្សផងដែរ។
 
សូមបញ្ជាក់ថា ស្មៅយក្ស គឺជាប្រភេទស្មៅដុះលូតលាស់លឿន និងមានសភាពធំរឹង ដែលអាចយកមកធ្វើជាជីវអុស សម្រាប់ឱ្យប្រជាពលរដ្ឋប្រើប្រាស់សម្រាប់ដុត ឬចម្អិនអាហារ ជំនួសការកាប់ឈើធម្មជាតិ និងឆ្លើយតបនឹងតម្រូវការសម្រាប់ថាមពលស្អាតរបស់រោងចក្រ និងវិស័យឧស្សាហកម្មផ្សេងៗ៕