ក្រចេះ៖ លោក សុខ សូកេន រដ្ឋមន្ត្រីក្រសួងអធិការកិច្ច បានអញ្ជើញប្រកាសតែងតាំងលោក អ៊ន មុនទ្រី ជាប្រធានមន្ទីរអធិការកិច្ចខេត្តក្រចេះ ជំនួសលោក ញ៉ឹប វិចិត្រ ដែលត្រូវចូលនិវត្តន៍។ ពិធីនេះធ្វើឡើងនៅថ្ងៃទី១៤ ខែកញ្ញា ឆ្នាំ២០២៦ នៅខេត្តក្រចេះ។

ក្នុងឱកាសនោះ លោករដ្ឋមន្ត្រីបានផ្តល់អនុសាសន៍ដល់ប្រធានមន្ទីរថ្មី និងមន្ត្រីរាជការទាំងអស់ ឱ្យបន្តថែរក្សាសមិទ្ធផលដែលសម្រេចបាន កសាងសមិទ្ធផលថ្មី ពង្រឹងសាមគ្គីភាពផ្ទៃក្នុង និងបង្កើនកិច្ចសហការជិតស្និទ្ធជាមួយអាជ្ញាធរដែនដីគ្រប់ជាន់ថ្នាក់ ដើម្បីបំពេញភារកិច្ចឱ្យកាន់តែមានប្រសិទ្ធភាព។

លោក សុខ សូកេន ក៏បានរំលឹកពីសកម្មភាពចុះសួរសុខទុក្ខកងទ័ពជួរមុខនៅខេត្តព្រះវិហារ និងបានលើកឡើងពីការការពារ និងថែរក្សាសម្បត្តិបេតិកភណ្ឌពិភពលោករបស់កម្ពុជា ជាពិសេសប្រាសាទព្រះវិហារ។ លោកបានបញ្ជាក់ពីការប្តេជ្ញាចិត្តរបស់រាជរដ្ឋាភិបាលកម្ពុជាក្នុងការដោះស្រាយបញ្ហាព្រំដែនដោយសន្តិវិធី និងផ្អែកលើច្បាប់អន្តរជាតិ រួមទាំងយន្តការផ្សះផ្សាក្រោមអនុសញ្ញាអង្គការសហប្រជាជាតិស្តីពីនីតិសមុទ្រ (UNCLOS)។

បន្ទាប់ពីពិធីប្រកាសចូលកាន់មុខតំណែង លោក សុខ សូកេន បានបន្តអញ្ជើញជាអធិបតីក្នុងពិធីសំណេះសំណាល និងសួរសុខទុក្ខថ្នាក់ដឹកនាំ និងមន្ត្រីនៃមន្ទីរអធិការកិច្ចខេត្តក្រចេះ ដើម្បីស្តាប់ពីស្ថានភាពការងារ បញ្ហាប្រឈម និងទិសដៅការងារនៅថ្នាក់ក្រោមជាតិ។

លោករដ្ឋមន្ត្រីបានកោតសរសើរចំពោះស្មារតីម្ចាស់ការរបស់មន្ទីរ និងបានលើកឡើងពីសមិទ្ធផលការងារសំខាន់ៗក្នុងនីតិកាលទី៧ គិតត្រឹមឆមាសទី១ ឆ្នាំ២០២៦ រួមមាន ការចុះអធិការកិច្ចចំនួន ២,៨០៧ អង្គភាព ការដោះស្រាយបណ្តឹងបញ្ចប់ចំនួន ១៨៨ បណ្តឹង ការតាមដានការអនុវត្តច្បាប់ចំនួន ៣,៨៥៣ មុខសញ្ញា និងការចុះអប់រំផ្សព្វផ្សាយច្បាប់ និងរៀបចំវេទិកាសាធារណៈចំនួន ៦០០ លើក។

លោកក៏បានជម្រាបអំពីការដាក់ចេញនូវលិខិតបទដ្ឋានគតិយុត្តសំខាន់ៗរបស់ក្រសួងអធិការកិច្ច រួមមាន ប្រកាសស្តីពីបទបញ្ជាផ្ទៃក្នុង ប្រកាសស្តីពីក្រមសីលធម៌មន្ត្រី និងការរៀបចំឯកសារទស្សនាទានច្បាប់ចំនួន២ ស្តីពីអធិការកិច្ច និងស្តីពីបណ្តឹងតវ៉ា និងបណ្តឹងបរិហារ ព្រមទាំងប្រព័ន្ធវាយតម្លៃការងាររបស់មន្ត្រី។

ក្នុងដំណើរទស្សនកិច្ចនៅខេត្តក្រចេះ លោក សុខ សូកេន ក៏បានបន្តដឹកនាំគណៈប្រតិភូចុះសាកសួរសុខទុក្ខប្រជាពលរដ្ឋដែលកំពុងសម្រាកព្យាបាលនៅមន្ទីរពេទ្យបង្អែកខេត្តក្រចេះ។ លោកបាននាំយកអំណោយ និងថវិកាមួយចំនួនចែកជូនអ្នកជំងឺ និងក្រុមគ្រួសារ ដើម្បីរួមចំណែកសម្រាលបន្ទុក និងជូនពរឱ្យឆាប់ជាសះស្បើយ។

ជាមួយគ្នានេះ លោករដ្ឋមន្ត្រីបានអញ្ជើញពិនិត្យការផ្តល់សេវាសាធារណៈនៅមន្ទីរពេទ្យបង្អែកខេត្តក្រចេះ និងថ្លែងអំណរគុណដល់ក្រុមគ្រូពេទ្យ និងបុគ្គលិកសុខាភិបាលទាំងអស់ ដែលបានខិតខំបំពេញភារកិច្ចដោយការទទួលខុសត្រូវ និងក្រមសីលធម៌វិជ្ជាជីវៈ ក្នុងការផ្តល់សេវាថែទាំ និងព្យាបាលជំងឺជូនប្រជាពលរដ្ឋប្រកបដោយគុណភាព ប្រសិទ្ធភាព និងរហ័សរហួន៕