អង្គការហត្ថាវេជ្ជសាស្ត្រ បណ្ដុះបណ្ដាលជំនាញបច្ចេកទេស Osteopathy ដល់គ្រូពេទ្យនៅមន្ទីរពេទ្យកុមារជាតិ ដើម្បីពង្រឹងសមត្ថភាពព្យាបាលអ្នកជំងឺ
(ភ្នំពេញ)៖ អង្គការហត្ថាវេជ្ជសាស្ត្រ សហការជាមួយមន្ទីរពេទ្យកុមារជាតិ បានរៀបចំវគ្គបណ្ដុះបណ្ដាលបច្ចេកទេសជំនាញលំនឹងសរីរាង្គ (Osteopathy) ជាមូលដ្ឋានដល់អ្នកជំនាញវិជ្ជាជីវៈក្នុងមន្ទីរពេទ្យកុមារជាតិ ដើម្បីបន្ថែមចំណេះដឹង និងជំនាញព្យាបាលដោយប្រើប្រាស់ដៃ សំដៅពង្រឹងសមត្ថភាពវិជ្ជាជីវៈ និងលើកកម្ពស់ការថែទាំអ្នកជំងឺ។
លោក សៀម ដានិត អ្នកសម្របសម្រួលរបស់អង្គការហត្ថាវេជ្ជសាស្រ្ដ បានមានប្រសាសន៍ថា កម្មវិធីបណ្ដុះបណ្ដាលនេះដឹកនាំដោយស្ថាបនិកអង្គការហត្ថាវេជ្ជសាស្ត្រ គឺលោកវេជ្ជបណ្ឌិត Patrick Jouhaud ជាសាស្រ្ដាចារ្យបណ្ដុះបណ្ដាលនៃជំនាញលំនឹងសរីរាង្គ(Osteopathy) ជនជាតិបារាំង ដែលមានគោលបំណងផ្ដល់ចំណេះដឹង និងបច្ចេកទេសថ្មីៗបន្ថែមដល់គ្រូពេទ្យដែលមានជំនាញវិជ្ជាជីវៈស្រាប់ ដើម្បីពង្រីកសមត្ថភាពក្នុងការពិនិត្យ និងថែទាំអ្នកជំងឺ។
លោកបានមានប្រសាសន៍ថា៖«គ្រូពេទ្យភាគច្រើនមានជំនាញព្យាបាលរៀងៗខ្លួនរួចហើយ ប៉ុន្តែវគ្គបណ្ដុះបណ្ដាលនេះផ្ដល់ជាមូលដ្ឋានថ្មីនូវចំណេះដឹងបន្ថែមអំពីបច្ចេកទេស Osteopathy ដែលផ្ដោតលើការប្រើប្រាស់ដៃក្នុងការពិនិត្យ និងថែទាំអ្នកជំងឺ ដើម្បីស្វែងយល់ពីប្រភពនៃការឈឺចាប់ និងបញ្ហារាងកាយផ្សេងៗ»។
លោកបានបន្ថែមថា ការបណ្ដុះបណ្ដាលនេះចាប់ផ្ដើមតាំងពីឆ្នាំ២០២២ ដោយមានអ្នកជំនាញជនជាតិបារាំងធ្វើជាគ្រូបង្គោល ហើយរៀបចំវគ្គបណ្ដុះបណ្ដាលចំនួន ៣ដងក្នុងមួយឆ្នាំ។ កម្មវិធីនេះមានគោលបំណងជួយឱ្យអ្នកជំនាញសុខាភិបាលទទួលបានចំណេះដឹងបន្ថែមសម្រាប់ការអនុវត្តវិជ្ជាជីវៈ និងការថែទាំអ្នកជំងឺ។
កន្លងមក អង្គការហត្ថាវេជ្ជសាស្ត្រ បានសហការជាមួយក្រសួងសុខាភិបាល និងមន្ទីរពេទ្យរដ្ឋមួយចំនួន រួមទាំងមន្ទីរពេទ្យកាល់ម៉ែត្រ និងស្ថាប័នសុខាភិបាលនៅតាមបណ្ដាខេត្តដូចជា សៀមរាប និងបាត់ដំបង ដើម្បីចែករំលែកចំណេះដឹង និងបណ្ដុះបណ្ដាលបច្ចេកទេស Osteopathy ដល់អ្នកជំនាញសុខាភិបាល។
តាមការលើកឡើងរបស់លោក សៀម ដានិត ជំនាញបច្ចេកទេសនេះក៏ត្រូវបានណែនាំសម្រាប់ការថែទាំស្ត្រីមានផ្ទៃពោះ និងស្ត្រីដែលជួបការលំបាកពាក់ព័ន្ធនឹងការសម្រាលកូនផងដែរ។ ទោះជាយ៉ាងណា ការអនុវត្តបច្ចេកទេសនីមួយៗត្រូវផ្អែកលើការវាយតម្លៃរបស់អ្នកជំនាញ និងភាពសមស្របតាមស្ថានភាពសុខភាពរបស់អ្នកជំងឺ។
ក្រៅពីសកម្មភាពបណ្ដុះបណ្ដាល អង្គការហត្ថាវេជ្ជសាស្ត្រក៏បានរៀបចំបេសកកម្មផ្ដល់សេវាថែទាំសុខភាពដល់កុមារកំព្រា និងកុមារងាយរងគ្រោះនៅតាមអង្គការ មណ្ឌលកុមារ និងសហគមន៍នានាក្នុងប្រទេសកម្ពុជា ដោយសហការជាមួយអង្គការដៃគូ និងស្ថាប័នពាក់ព័ន្ធ។
បេសកកម្មទាំងនេះមានការចូលរួមពីក្រុមវេជ្ជបណ្ឌិតមកពីប្រទេសបារាំង និងរ៉ូម៉ានី ហើយត្រូវបានរៀបចំប្រមាណ ២ទៅ ៣ដងក្នុងមួយឆ្នាំ ជាទូទៅនៅអំឡុងខែមីនា ខែកក្កដា និងខែធ្នូ ដើម្បីរួមចំណែកលើកកម្ពស់ការថែទាំសុខភាពសម្រាប់កុមារ និងក្រុមប្រជាជនដែលងាយរងគ្រោះនៅកម្ពុជា៕
