ភ្នំពេញ៖ សហព័ន្ធអតីតជនជាតិខ្មែរនៅអ៊ីស្រាអែល (ACI) និងក្លឹបសន្តិភាពនៅ​​កម្ពុជា (Shalom Club) ត្រូវបានសម្ពោធជាផ្លូវការនៅថ្ងៃនេះ ដែលតភ្ជាប់ប្រជាជនកម្ពុជាដែលបានទទួលការបណ្តុះបណ្តាល សិក្សា ឬធ្វើការនៅអ៊ីស្រាអែល ជាមួយនឹងដៃគូអន្តរជាតិ។
 
ព្រឹត្តិការណ៍នេះត្រូវបានធ្វើឡើងនៅសណ្ឋាគារ Himawari ក្នុងរាជធានីភ្នំពេញ នាថ្ងៃទី៦ ខែវិច្ឆិកា ឆ្នាំ២០២៦ត្រូវបានសហការរៀបចំដោយស្ថានទូតអ៊ីស្រាអែលប្រចាំកម្ពុជា, សភាពាណិជ្ជកម្មកម្ពុជា-អ៊ីស្រាអែល (CICC) និង ACI ក្រោមអធិបតីភាពដ៏ខ្ពង់ខ្ពស់របស់ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈនៃព្រះរាជាណាចក្រកម្ពុជា និងដោយមានការអញ្ជើញចូលរួមពីលោក Rami Teplitskiy អនុប្រធានបេសកកម្មការបរទេសអ៊ីស្រាអែលប្រចាំកម្ពុជា និងលោកស្រី Shai Revivo ប្រធានផ្នែកកិច្ចការកម្ពុជានៃស្ថានទូតអ៊ីស្រាអែល។
 
អតីតនិស្សិតដែលត្រូវបានជ្រើសរើសចំនួន ៤៣រូបបានចូលរួម ព្រមទាំងមានការអញ្ជើញចូលរួមពីតំណាង ក្រសួងការងារ និងបណ្តុះបណ្តាលវិជ្ជាជីវៈ ក្រសួងអប់រំ យុវជន និងកីឡា ក្រសួងកសិកម្ម រុក្ខាប្រមាញ់ និងនេសាទ និងកុងស៊ុលកិត្តិយសអ៊ីស្រាអែលប្រចាំកម្ពុជា អ្នកឧកញ៉ាបណ្ឌិត សួរ វីរៈ។
 
ក្នុងរយៈពេលជាច្រើនឆ្នាំកន្លងមកនេះ ប្រជាជនកម្ពុជាជាច្រើនបានទៅប្រទេសអ៊ីស្រាអែល ដើម្បីទទួលការបណ្តុះបណ្តាល ចូលរួមក្នុងកម្មវិធីវិជ្ជាជីវៈ ឬធ្វើការ។ រហូតមកដល់ពេលនេះ មិនទាន់មានរចនាសម្ព័ន្ធណាមួយដើម្បីរក្សាទំនាក់ទំនង និងប្រមូលផ្តុំចំណេះដឹងរបស់ពួកគេក្រោយពេលត្រឡប់មកវិញនៅឡើយទេ។ ACI នឹងបំពេញចន្លោះប្រហោងនេះ​ ដោយប្រមូលផ្តុំអ្នកហាត់ការ និស្សិត និងពលករចូលទៅក្នុងសហព័ន្ធតែមួយ ដើម្បីធានាថា ជំនាញ និងបទពិសោធន៍ដែលពួកគេទទួលបាននៅអ៊ីស្រាអែល ត្រូវបានយកមកប្រើប្រាស់យ៉ាងត្រឹមត្រូវនៅកម្ពុជា។
 
លើសពីនេះ ACI ក៏ជាច្រកចូលប្រចាំកម្ពុជាសម្រាប់ Shalom Club ដែលជាបណ្តាញអតីតនិស្សិតទូទាំងពិភពលោករបស់ MASHAV ដែលជាទីភ្នាក់ងារសហប្រតិបត្តិការអភិវឌ្ឍន៍អន្តរជាតិរបស់អ៊ីស្រាអែលផងដែរ។ ក្លឹបសន្តិភាពនេះប្រតិបត្តិការនៅក្នុងប្រទេសជាច្រើន និងផ្តល់វេទិកាដល់និស្សិតបញ្ចប់ការសិក្សាពី MASHAV ដើម្បីផ្លាស់ប្តូរចំណេះដឹង កសាងទំនាក់ទំនងវិជ្ជាជីវៈ និងចាប់ផ្តើមគម្រោងនានានៅក្នុងសហគមន៍របស់ពួកគេ។ តាមរយៈការសម្ពោធនេះ អតីតនិស្សិតកម្ពុជានឹងចូលរួមជាមួយបណ្តាញអ្នកអនុវត្តសកលលោកមួយនេះ។
 
ជាមួយគ្នានេះដែរ ACI គឺជាកម្មសិទ្ធិរបស់សមាជិកទាំងអស់។ វាជាសហព័ន្ធដឹកនាំដោយអតីតនិស្សិត ដែលកំណត់អាទិភាព និងសកម្មភាពរបស់ខ្លួនស្របតាមតម្រូវការជាក់ស្តែងរបស់កម្ពុជា។ យ៉ាងណាមិញ ACI មិនឯកោនោះទេ CICC ក្នុងនាមជាអ្នកសម្របសម្រួលស្ថាបនិក ព្រមទាំងស្ថានទូតអ៊ីស្រាអែល និងរាជរដ្ឋាភិបាលកម្ពុជា តែងតែគាំទ្របណ្តាញនេះ តាមរយៈការតភ្ជាប់ជំនាញ និងលទ្ធភាពចូលទៅកាន់ស្ថាប័ននានានៅក្នុងប្រទេសទាំងពីរ។
 
ម្យ៉ាងទៀត ACI និង Shalom Club នឹងផ្តោតលើវិស័យចំនួនប្រាំ៖ ការកសាងបណ្តាញអតីតនិស្សិតសកម្មនៅទូទាំងវិស័យនានា, ការចែករំលែកចំណេះដឹងតាមរយៈសិក្ខាសាលា ការប្រជុំវិជ្ជាជីវៈ និងវគ្គចែករំលែកជាមួយអ្នកជំនាញអ៊ីស្រាអែល, ការអភិវឌ្ឍគម្រោងជាក់ស្តែងដែលឆ្លើយតបទៅនឹងតម្រូវការក្នុងស្រុក ឧទាហរណ៍ក្នុងវិស័យកសិកម្ម ធនធានទឹក សុខាភិបាល និងការអប់រំ, ការផ្តល់ការប្រឹក្សាយោបល់ (Mentoring) ដោយមានអតីតនិស្សិតដែលមានបទពិសោធន៍ជួយគាំទ្រអ្នកដែលទើបនឹងត្រឡប់មកវិញ, និងការរក្សាទំនាក់ទំនងវិជ្ជាជីវៈដោយផ្ទាល់ជាមួយប្រទេសអ៊ីស្រាអែល។
 
លោក រ័ត្ន សារ៉ា ប្រធាននាយកដ្ឋានតម្រង់ទិសវិជ្ជាជីវៈ នៃក្រសួងអប់រំ យុវជន និងកីឡា ដែលលោកផ្ទាល់ក៏ជាអតីតនិស្សិត MASHAV ផងដែរនោះ បានចែករំលែកបទពិសោធន៍របស់លោកនៅអ៊ីស្រាអែល និងជំនឿរបស់លោកចំពោះអ្វីដែល ACI អាចសម្រេចបាន។ លោកបានបញ្ជាក់ជាថ្មីអំពីការគាំទ្ររបស់ក្រសួងអប់រំ យុវជន និងកីឡា តាមរយៈក្រុមការងារអន្តរក្រសួងដែលបានបង្កើតឡើងសម្រាប់គោលបំណងនេះ។
 
ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានស្វាគមន៍ចំពោះការសម្ពោធ ACI និង Shalom Club ថា ជាស្ពានសម្រាប់ពង្រឹងទំនាក់ទំនងទ្វេភាគីឲ្យកាន់តែរឹងមាំ និងជាកម្លាំងចលករថ្មីនៃការអភិវឌ្ឍធនធានមនុស្ស ស្របតាមចក្ខុវិស័យរបស់កម្ពុជា ក្នុងការក្លាយជាប្រទេសចំណូលខ្ពស់នៅឆ្នាំ២០៥០។ ឯកឧត្តមបានអំពាវនាវដល់អតីតនិស្សិតឱ្យចែករំលែកជំនាញរបស់ពួកគេ ផ្តល់ការប្រឹក្សាដល់យុវជនជំនាន់ក្រោយ និងគាំទ្រពលករកម្ពុជា ដែលត្រៀមខ្លួនទៅធ្វើការនៅអ៊ីស្រាអែល រួមទាំងការធ្វើជាគ្រូបណ្តុះបណ្តាលផ្នែកជំនាញបច្ចេកទេស ភាសាមូលដ្ឋាន និងវប្បធម៌អ៊ីស្រាអែលផងដែរ។