ភ្នំពេញ៖ រដ្ឋមន្ត្រីក្រសួងព័ត៌មាន​ លោក​ នេត្រ​ ភក្ត្រា​ បានឱ្យដឹងថា​ ថ្នាក់ដឹកនាំហ្វ្រង់កូហ្វូនី​ គ្រោងនឹងពិភាក្សាលើសេចក្តីសម្រេចស្តីពី​ ការបង្ការជម្លោះ ការសម្របសម្រួល និងការស្តារឡើងវិញក្រោយវិបត្តិ នៅរាជធានីភ្នំពេញ នៅថ្ងៃទី១៦ ខែវិច្ឆកា ឆ្នាំ២០២៦​ ខណៈអង្គការនេះកំពុងពិចារណាពង្រឹងតួនាទីរបស់ខ្លួនក្នុងការជួយសមាជិកដោះស្រាយវិបត្តិ។

លោក នេត្រ ភក្ត្រា បានឱ្យដឹងដូចនេះ​ ក្នុងសន្និសីទសារព័ត៌មាននៅរសៀលថ្ងៃទី១៥ ខែវិច្ឆិកា​ ឆ្នាំ២០២៦​ ក្នុងឱកាសកិច្ចប្រជុំកំពូលហ្វ្រង់កូហ្វូនីលើកទី២០​ បន្ទាប់ពីសម្តេចធិតី​ ហ៊ុន ម៉ាណែត បានថ្លែងក្នុងពិធីបើកកិច្ចប្រជុំកំពូល ដោយអំពាវនាវឱ្យកម្ពុជា និងថៃគោរពកិច្ចព្រមព្រៀងដែលមានស្រាប់ និងបន្តការងាររួមគ្នាក្នុងការវាស់វែង និងបោះបង្គោលព្រំដែនគោកឡើងវិញ។

លោក នេត្រ ភក្ត្រាបានលេីកឡេីងយ៉ាងដូច្នេះថា៖ «ឯកសារនយោបាយនេះ​ លើកកម្ពស់​សន្ដិភាព សហវិជ្ជមាន​ កិច្ច​សហប្រតិបត្ដិការ​សង្គម វប្បធម៌​ សេដ្ឋកិច្ច​ និង​ការ​អភិវឌ្ឍ​សហគម។ ទីពីរ​ គឺសេចក្តីសម្រេចស្ដីពី​ស្ថានភាព​វិបត្ដិ​ផ្តោតលើការបង្ការជម្លោះ ការគាំទ្រកិច្ចខិតខំប្រឹងប្រែងសម្របសម្រួល ការស្វែងរកច្រកចេញពីវិបត្តិ និងការគាំទ្រការស្តារឡើងវិញ និងការកសាងសន្តិភាពក្រោយវិបត្តិ»។

លោករដ្ឋមន្ដ្រីព័ត៌មាន​ បានបញ្ជាក់ថា សេចក្តីសម្រេចនេះជាឯកសារក្នុងចំណោមឯកសារចំនួនបី ដែលត្រូវបានដាក់ជូនប្រមុខរដ្ឋ និងប្រមុខរដ្ឋាភិបាល ដើម្បីពិភាក្សា និងពិចារណាអនុម័តនៅថ្ងៃទីពីរនៃកិច្ចប្រជុំកំពូល។

ចំពោះឯកសារទីបីគឺ​ សេចក្តីអំពាវនាវក្រុងភ្នំពេញ ដែលជាគំនិតផ្តួចផ្តើមរបស់កម្ពុជាស្តីពី​ ការការពារបេតិកភណ្ឌវប្បធម៌ និងការលើកកម្ពស់ភាពចម្រុះនៃវប្បធម៌។

លោករដ្ឋមន្ដ្រីព័ត៌មាន​ ក៏បានឱ្យដឹងដែរថា កិច្ចប្រជុំកំពូលនេះនឹងផ្តល់ឱកាសឱ្យថ្នាក់ដឹកនាំពិភាក្សាអំពីតួនាទីរបស់អង្គការអន្តរជាតិហ្វ្រង់កូហ្វូនី (OIF) ក្នុងការជំរុញកិច្ចសន្ទនា កសាងទំនុកចិត្ត និងគាំទ្រស្ថេរភាពក្នុងចំណោមសមាជិក។​

លោក នេត្រ ភក្ត្រា បានថ្លែងថា កម្ពុជាបានផ្តួចផ្តើមសេចក្តីអំពាវនាវក្រុងភ្នំពេញដោយផ្អែកលើបទពិសោធន៍របស់ខ្លួនក្នុងការប្រយុទ្ធតាមព្រំដែនកាលពីឆ្នាំ២០២៥។​ លោករំពឹងថា ឯកសារទាំងបីនឹងក្លាយជាលទ្ធផលនយោបាយសំខាន់នៃកិច្ចប្រជុំកំពូល ដែលមានប្រធានបទស្តីពីការវិនិយោគឡើងវិញលើសន្តិភាព ដើម្បីវិបុលភាពរួម និងស្ថេរភាពយូរអង្វែង។​ ថ្នាក់ដឹកនាំក៏គ្រោងកំណត់អាទិភាពសម្រាប់កិច្ចសហប្រតិបត្តិការនាពេលខាងមុខ លើវិស័យអប់រំ កិច្ចការយុវជន និងស្ត្រី សេដ្ឋកិច្ចឌីជីថល នវានុវត្តន៍ និងអភិបាលកិច្ច។

លោក នេត្រ ភក្ត្រា បានបន្ថែមថា ថ្នាក់ដឹកនាំនឹងពិនិត្យរចនាសម្ព័ន្ធកម្មវិធីការងាររបស់ OIF សម្រាប់ឆ្នាំ២០២៤–២០២៧ និងពិចារណាទិសដៅយុទ្ធសាស្ត្ររបស់អង្គការនាពេលខាងមុខ។
បេីតាម​ លោក នេត្រ ភក្ត្រា របៀបវារៈការពិចារណាលើពាក្យសុំចូលជាសមាជិក សំណើផ្លាស់ប្តូរឋានៈសមាជិក និងការបោះឆ្នោតជ្រើសរើសអគ្គលេខាធិការរបស់អង្គការផងដែរ។

សូមបញ្ជាក់ថា​ សម្តេចធិតី​ ហ៊ុន ម៉ាណែត បានថ្លែងប្រាប់ក្នុងពិធីបើកកិច្ចប្រជុំកំពូលថា​ ការខូចខាតនៅប្រាសាទព្រះវិហារ ប្រាសាទតាមាន់ និងប្រាសាទតាក្របី គឺបណ្តាលមកពីការ​ឈ្លានពានប្រដាប់​អាវុធ​ខុស​ច្បាប់​​របស់យោធាថៃមកលើកទឹក​ដី​កម្ពុជា​កាលពី​ឆ្នាំ​២០២៥​។​ ទន្ទឹមនេះប្រជាពលរដ្ឋកម្ពុជាប្រមាណ ២ម៉ឺននាក់​ នៅតែមិនអាចត្រលប់ទៅលំនៅឋានរបស់ពួកគេវិញ ហើយការវិលត្រលប់ប្រកបដោយសុវត្ថិភាព និងសេចក្តីថ្លៃថ្នូរនៅតែជាអាទិភាព៕